Petropavldaǵy daýyl: qalada elektr energııasyn berý qalpyna keltirildi

PETROPAVL. QazAqparat – Petropavlda energetıkter keshe keshke bolǵan daýyldyń saldarymen kúresip, túske deıin jaryqsyz otyrǵan úılerde elektr qýaty qalpyna keltirildi, dep habarlaıdy QazAqparat tilshisi.

«Sevkazenergo» AQ baspasóz qyzmetiniń málimetinshe, qazirgi ýaqytta Petropavlda elektr qýatynsyz otyrǵan úı joq, ol tolyq qalpyna keltirildi.

«7 maýsym kúni naızaǵaı oınap, qatty jel turyp, Petropavl qalasy boıynsha 13 qosalqy stantsııa isten shyqty. Jedel túrde 4 brıgada jasaqtalyp, túni boıy jumys istedi. Tańǵy saǵat 8.00-ge deıin negizgi nysandarǵa jaryq berildi. Túske deıin jeke turǵyn úılerdiń ótinimderimen aınalystyq. Qatty jelden elektr symdary úzilgen», - deıdi «Soltústik Qazaqstan Elektrjelilik Taratý Kompanııasy» AQ bas dırektory Anatolıı Kazanovskıı.

Energetıktiń aıtýynsha, olar tabıǵattyń mundaı tosyn minezine daıyn bolǵan.

«Ádette, bizdiń aımaqta aptap ystyqtan keıin daýyldatyp, naızaǵaılatyp jaýyn jaýady. 6 maýsym kúni barlyq qurylymdyq bólimshelerge telefonogramma joldandy. Barlyq kerek-jaraqty, qosalqy bólshekterdi ázirlep, daýyldyń saldaryn joıýǵa daıyn otyrýdy eskerttik. Óıtkeni, kóp jylǵy tájirıbeden ystyqtan keıin qatty daýyldy jańbyr jaýatynyn kórip júrmiz», - deıdi Anatolıı Kazanovskıı.

Buǵan deıin Petropavlda kommýnaldyq qyzmetterdiń daýyldyń saldarymen kúresip jatqanyn aıtqan edik. «Іkomek-109» qyzmetine oblys ortalyǵy turǵyndarynan keshki saǵat 21.00-den tańǵy saǵat 8.00-ge deıin 215 ótinish kelip túsken. Onyń 90 % jaryqtyń sóndirilýine qatysty bolǵan.