Petropavldaǵy botanıkalyq baqty jóndeýge 20 mln teńge bóldi
PETROPAVL. QazAqparat - Petropavldaǵy botanıkalyq baq ǵımaratynyń qasbetin jóndeý jumystary 140 kún keshikti. Ruqsat qaǵazdaryn jınaý úshin osynsha ýaqyt ketken.
Aıaz túskenge deıin munda irgeniń kirpish qalaýyn almastyrý, vıtrajdardy jóndeý jáne jaryq túsken shynypaketterdi aýystyrý jumystary aıaqtalýy tıis. Sonymen qatar oranjereıanyń shatyry men vıtrajdarynan jaýyn sýy men erigen qardyń sýyn aǵyzatyn sýaǵar ákeledi jáne qysqy baqtyń shatyryn qalypqa keltiredi.
«Qyzyljar oranjereıasy» MKQK basshysy Artýr Rıazapov atap ótkendeı, ǵımarat konstrýktsııasy jumys isteıtin jylý- jáne gıdrorejımder men paıdalanylatyn materıaldardyń sapasy eskeriledi.
Jóndeý jumystaryn júrgizý úshin jergilikti bıýdjetten 20 mln teńge bólindi. Jóndeý jumystary boıynsha bas merdiger «Eńbek-Qyzyljar» fılıaly, sýbmerdiger - Mıras Group JShS, tehnıkalyq baqylaýdy «Stroı Integramm» JShS júzege asyrady, avtorlyq baqylaýdy «Sevgrajdanproekt» JShS júrgizedi.
Botanıkalyq baqty jóndeýdegi qajettilik aǵymdaǵy jyldyń sáýirinde týyndaǵan. Alty jyl buryn qalpyna keltirilgen ǵımarat qıraı bastady. Sol kezde nysanǵa óńir basshysy Erik Sultanov barǵan. Ol Petropavl ákimine ǵımaratty jóndeý tapsyrmasyn bergen.
1912 jyly negizi qalanǵan Petropavl botanıkalyq baǵynda álemniń túrli elderinde ósetin shamamen 2 myń ekzotıkalyq ósimdik bar.
