Petropavldaǵy bir saılaý ýchaskesi jumysyn aıaqtady

PETROPAVL. QazAqparat – Petropavldaǵy Ulttyq ulan akademııasynyń áskerı qyzmetshileri alǵashqylardyń biri bolyp daýys berýdi bastap, saǵat 8-den sál asa № 655 saılaý ýchaskesi jumysyn ıaqtady, dep habarlaıdy QazAqparat tilshisi.

QR Ulttyq ulany akademııasy baspasóz qyzmetiniń málimetinshe, № 655 saılaý ýchaskesi ornalasqan Ulttyq ulan akademııasynda daýys berý tańsáride bastaldy.

«Áskerı nysandarda daýys berýdi saǵat 6.00-den bastaýǵa ruqsat etilgen. Sondyqtan saılaý ýchaskesi óz jumysyn jergilikti ýaqyt boıynsha 6.00-de Qazaqstan Respýblıkasy Ánuranymen bastady. Bul jerde 687 daýys berýshi bar. Olardyń negizgi bóligin kýrsanttar quraıdy. Óz tańdaýyn birinshi bolyp Ulttyq ulan akademııasynyń bastyǵy Artýr Toqyshev jasady», - deıdi QR Ulttyq ulany akademııasynyń baspasóz hatshysy Oljas Ádilbek.

№ 655 saılaý ýchaskesinde kúnniń birinshi jartysynda 8.15-te daýys berý aıaqtaldy.

«Búgingi saılaý – árbir qazaqstandyq úshin óte mańyzdy oqıǵa. Májilis pen máslıhattar depýtattaryn saılaýǵa qatysý arqyly biz birinshi kezekte ózimizdiń belsendi azamattyq ustanymymyzdy bildiremiz.

Men daýys berý múmkindigin óz quqyǵym emes, mindetim dep sanaımyn», - deıdi 3-kýrs kýrsanty Aıdos Jumaǵulov.

Aıta keteıik, Ulttyq ulan akademııasy tek Ulttyq ulan úshin ǵana emes, Qazaqstan Respýblıkasynyń basqa da áskerleri men áskerı quralymdary úshin ofıtserlik kadrlardyń ustahanasy ispettes. 25 jyldyq tarıhynda oqý orny 4 myńnan astam ofıtserdi daıarlap shyqty.