Petropavldaǵy bilim berý nysandarynyń 88 paıyzy jylytý maýsymyna ázir
PETROPAVL. QazAqparat – Petropavldaǵy 83 bilim berý nysanynyń 88 paıyzy búginde jylytý maýsymyna ázirlik pasportyn aldy, dep habarlaıdy QazAqparat tilshisi.
Petropavl qalalyq ákimdiginiń málimetinshe, búgin Petropavldaǵy bilim berý nsyndarynyń jańa oqý jylyna daıyndyǵy ákimdik otyrysynda qaraldy. Oblys ortalyǵynda 36 mektep, 28 memlekettik jáne 15 jekemenshik mektepke deıingi mekeme, qosymsha bilim berýdiń 2 mekemesi, 2 tútezý kabıneti jumys isteıdi. Bul nysandardy jylytý maýsymyna ázirleý úshin bıyl jergilikti bıýdjetten 7 mln teńge shamasynda qarajat bólindi. Qazirgi ýaqytta 83 bilim berý nysanynyń 73-i qysqa tolyq daıyn.
Mamandardyń aıtýynsha, bıyl jan basyna qarjylandyrý aıasynda № 24 orta mektepke aǵymdaǵy jóndeý júrgizildi. Ekinshi qabatynyń aǵash edeni plıtkaǵa aýystyrylyp, tóbesi men qabyrǵalary jańartyldy, esikteri aýystyryldy.
№ 23 orta mektepte sport alańy jónge keltirilmek. Fýtbol, vorkaýt alańy jańartylady. Osy maqsatqa 38 mln teńge jumsalmaq.
Al 2022-2023 oqý jylyna qajet oqýlyqtar men oqý-ádistemelik keshenderdi alýǵa bıýdjetten 281 mln 835 myń teńge bólingen.
«Mektepke jol» aktsııasy aıasynda kóp balaly, az qamtylǵan otbasylarǵa, jetim jáne ata-ana qamqorlyǵynsyz qalǵan balalarǵa kómek kórsetiledi. Respýblıkalyq aktsııanyń bastalǵandyǵy týraly buıryq shyǵarylyp, barlyq vedomstvolyq uıymdar eskertildi. Arnaıy jospar ázirlenip, bekitildi. Kómekke muqtaj balalardy anyqtaý úshin áleýmettik qyzmetkerler, synyp jetekshileri jáne ýchaskelik polıtsııa ınspektorlary aýqymdy jumys júrgizdi. Qazirgi ýaqytta tizim jasaldy. Bul balalar kıim-keshekpen jáne oqý quraldarymen qamtylady», - dedi Petropavl qalalyq bilim bóliminiń mamandary.
Buǵan deıin Soltústik Qazaqstan oblysynda erekshe bilim berýge qajettilikteri bar balany psıhologııalyq-medıtsınalyq-pedagogıkalyq keńesten ótkizý úshin 2-3 aılap kezek kútý qajettigin aıtqan edik. Petropavldaǵy PMPK 84 myń balaǵa qyzmet kórsetýge májbúr.
