Petropavldaǵy balalar úıi qaıta qurylady
PETROPAVL QazAqparat - SQO-daǵy Polýdınskıı balalar úıi qaıta qurylatyn bolady, dep habarlaıdy «QazAqparat» HAA tilshisi.
Oblystyq bilim basqarmasy basshysynyń orynbasary Kúlpash Qalǵojınovanyń aıtýynsha, bul óńirdegi balalar úıi tárbıelenýshileriniń azaıýyna baılanysty týyndap otyr.
«Basqarma balalar úıiniń tárbıelenýshilerin otbasylarǵa ornalastyrý jumystaryn nátıjeli túrde júrgizip keledi. 2015 jyly 155 bala, 2016 jyly - 160, 2017 jyly 137 bala otbasylyq tárbıege berildi. Petropavl qalasynda 200 oryndyq balalar úıi jumys istep tur. Qazir munda 70 bala bar, oqý jylynyń basynda bul san 50-ge jetedi. Ondaǵy qyzmetkerlerdiń sany 100 adam, 56 pedagog bar. Petropavl balalar úıine qosý arqyly Polýdınskıı balalar úıin qaıta qurýdy usynamyz»,-deıdi Q Qalǵojına.
SQO ákimi Qumar Aqsaqalov otbasylarǵa berilgen balalardyń jaǵdaıyn baqylap, árdaıym nazarda ustap otyrýdy tapsyrdy.
«Jumysty jalǵastyramyz, monıtorıng úzilmeýi kerek. Balalar úıindegi atmosferany barlyǵymyz jaqsy bilemiz. Túlekter úshin áleýmetpen aralasyp ketý qandaı qıynǵa túsetinin de bilemiz»,-dedi Qumar Aqsaqalov.
SQO-da jetim jáne ata-ana qaraýynsyz qalǵan balalarǵa arnalǵan 6 mekeme jumys istep tur.
