Petropavldaǵy balalar teatry «Batyr Baıandy» sahnalady
PETROPAVL. QazAqparat - Petropavldaǵy «DIGITAL URPAQ» oqýshylar saraıynda jaqynda ashylǵan balalar teatry alǵashqy qoıylymyn sahnalady. Maǵjan Jumabaevtyń «Batyr Baıanyn» joǵary deńgeıde oryndap shyqqan jasóspirimder endi spektakldi qalanyń oqý oryndarynda oınamaq, dep habarlaıdy QazAqparat tilshisi.
M. Jumabaevtyń «Batyr Baıan» poemasy negizinde qoıylǵan spektakldiń jelisi qarapaıym bolǵanymen, tragedııaǵa toly. Abylaı hannyń batyrlarynyń biri Baıannyń 15 jastaǵy inisi Noıan qalmaqtyń qyzyna ǵashyq bolady. Sulýdyń «meniń elime ketsek, men sendik bolam» degen sózinen keıin bozbala atajurtyn tastap qashady. Baıanǵa satqyn inisin óltirýden basqa amal qalmaıdy. Qaıǵy jutqan batyr keıin ózi bir soǵysta qaza tabady.
Basty róldi somdaǵan Danııal Erejepov «Bilim ınnovatsııa» mamandandyrylǵan lıtseı-ınternatynyń 11-synyp oqýshysy. Bolashaq mamandyǵyn ol teatrmen baılanystyrmaq.
«Kórermenniń kóńilinen shyqtym dep oılaımyn. Óıtkeni, janymdy salyp oınadym. Baıan inisin óltirgen kezde men shynaıy jyladym. Spektakldi sahnaǵa daıyndaý barysynda kóp izdendim. Poemany qaıta oqyp shyǵýǵa týra keldi. Qazir 11-synypta oqımyn. Almatyǵa, teatr ınstıtýtyna oqýǵa túsýdi josparlap otyrmyn. Qoıýshy-rejısser mamandyǵyn alǵym keledi», - deıdi Danııal.
«Tolaǵaı» balalar teatrynyń quramynda qazir 60 shaqty oqýshy bar. Bul joly olardyń jartysynan astamy alǵash ret kórermen aldyna shyǵyp, óner kórsetti. Alda petropavldyqtarǵa 9 mamyr - Jeńis kúnine oraı jańa qoıylym usynbaq. «DIGITAL URPAQ» oqýshylar saraıy janynan ashylǵan balalar teatrynyń rejısseri Dáýren Toıbazarovtyń aıtýynsha, jasóspirimdermen úlken jumys atqaryldy. Olar jas bolǵanyna qaramastan, qıyn rólderdi oıdaǵydaı alyp shyǵa bildi. Bul - balalardyń akterlik sheberligin shyńdap qana qoımaı, olarǵa patrıottyq tárbıe beredi, tarıhqa degen qyzyǵýshylyǵyn oıatady.
Jas sahnagerler «Batyr Baıan» spektaklin endi Petropavldyń oqý oryndarynda qoımaq.
