Petropavldaǵy «Ájeler mektebi» qyz-kelinshekterge salt-dástúrdi nasıhattap keledi

Petropavlda Ortalyq meshit janynan ashylǵan «ájeler mektebi» eki jyldyń ishinde oblys ortalyǵyndaǵy ulttyq mektepterde, kolledjderde oqýshy qyzdarmen, ustazdarymen ondaǵan kezdesý, túrli taqyrypta tanymdyq sharalar ótkizdi. Olardyń kóńilge qonymdy aqyl-keńesi eshkimdi beıjaı qaldyrmaıdy.

«Maqsatymyz - jastarǵa tálim-tárbıe berý. Buryn nege «qyzǵa qyryq úıden tyıý» degen? Qyzdarmen jıi kezdesip, aıta bersek, qulaqtaryna quıa bersek nátıje bolady. Nátıje bar, ata-analar, muǵalimder, joǵary synyptyń oqýshy qyzdary kezdesýden keıin sońymyzdan qalmaı «ájeler kelesi kezdesý qashan bolady, bizge sondaı taqyrypta áńgime ótkizesizder me?» dep surap jatady», - deıdi «ájeler mektebiniń» tóraǵasy Yrysjamal Álenova.

Petropavldaǵy «ájeler mektebiniń» eń jasy úlken ustazy - Sapýra Táshenova. Keıýana bıyl 87-ge kelipti. Ákesi dindar bolǵan kisi, anasynan jastaıynan jetim qalǵan eken. Sol sebepti negizinen áke tárbıesin kórip ósedi. Búginde Alla jolynda júrgen aq jaýlyqty áje óziniń ómirden kórgenin, bilgen-túıgenin jastarǵa aıtyp keledi.

«Qyz bala basyna oramal salmaǵan, oranbaǵan. Ár ulttyń óz salt-dástúri bar ǵoı. Qazaqtyń qyzy shashyn ádemi qylyp órip, taqııa kıdi, bórik kıdi. Namazdy moınyna oramal salyp, basyna taqııasyn kıip, shymyldyq ishinde oqydy. Shashty bos qoıa bermedi. Jas kelinshekterdiń kúıeýi qaıtqanda, qatty ashynǵanda shashyn jaıyp jiberip jylaıdy eken. Al, qazir shashty jaıyp júrý sánge aınalǵan. Áıelderge nekeli bolǵasyn shashty kórsetý kúná bolady. Bizdiń tilegimiz jastar qazaqsha sóılese eken, ıbaly, tártipti, ádemi bolsa eken», - deıdi Sapýra Táshenova.

«Ájeler mektebiniń» quramyna negizinen qajylyqqa baryp kelgen, kópti kórgen, aıtary bar ulaǵatty analar engen. Kóbi - ustaz bolyp eńbek etken. Solardyń biri - Petropavl qalasynyń turǵyny Qymbat Ismanova. Kóp jyldar boıy Maǵjan Jumabaev atyndaǵy gýmanıtarlyq kolledjde ustazdyq etti, bolashaq muǵalimderdi daıarlady. Ardager-ustazdyń bala tárbıesine qatysty eki kitaby jaryq kórgen.

«Jastardyń tárbıesi aqsap tur. Oǵan ne sebep? Otbasyndaǵy tárbıeniń mańyzy zor. Otbasyndaǵy ananyń, ákeniń rólderi óz ornynda bolýy qajet ertedegideı. Áke óz tuǵyrynan tómendep ketti. Qyz bala tárbıeli bolýy úshin onyń anasy ónege kórsetýi kerek. Qyz balany úı sharýasyna, tamaq pisirýge úıretpeımiz, ene men kelin arasynda kıkiljińder osydan bastalady. Kóp másele ustazdarǵa da baılanysty. Ál Farabı atamyz aıtqan «tárbıesiz berilgen bilim ol - adamzattyń qas jaýy» dep. Muǵalimder sabaǵynyń jartysyn tárbıege bólýi kerek»,-deıdi ardager-ustaz Qymbat Esmuqanqyzy.

Áje ónegesin jas urpaq boıyna sińirtip júrgen «ájeler mektebi» - búgingi qoǵamda taptyrmas tárbıe quralyna aınalǵan. Ájelerdiń áńgimesin, aqyl-keńesin tyńdaý úshin qala mektepteri búginde olardy arnaıy shaqyratyn bolypty.