Petropavldaǵy aýyl sharýashylyǵy jármeńkesine 1,1 myń tonna ónim ákelindi

PETROPAVL. QazAqparat – Petropavlda dástúrli aýyl sharýashylyǵy jármeńkesi ótip jatyr. 100-ge jýyq kásipker shamamen 1100 tonna ónim ákelip, taýardy aryqtaǵy baǵadan 15-20 % arzanǵa saýdalap jatyr, dep habarlaıdy QazAqparat tilshisi.

Petropavldaǵy M.Jumabaev kóshesi bir sátte úlken saýda alańyna aınalyp shyǵa keldi. Tańerteńnen jurt jylyna bir ret ótetin aýyl sharýashylyǵy jármeńkesine aǵylyp, azyq-túlikti arzanǵa alyp qalýǵa tyrysty. Halyq kóp, ár shatyrdyń mańynda qyzý saýda júrip jatyr. Turǵyndar arasynda ásirese etke suranys joǵary. Búgin onyń 50 tonnasy jármeńkege ákelingen.

«Aýyl sharýashylyǵy jármeńkesine oblystyń barlyq 13 aýdany jáne Petropavldan 100-ge jýyq kásipker qatysyp jatyr. 1100 tonna túrli ónim ákelindi. Onyń ishinde sıyr, taýyq eti, maı, sút, bal, jumyrtqa, balyq, kókónister bar. Baǵasy 15-20 % naryqtaǵy baǵadan tómen.

Jyl saıyn kúzde dástúrli túrde ótkiziledi. Budan basqa oblys ortalyǵyndaǵy úsh bazarda ár senbi saıyn uıymdastyryp jatyrmyz. Turǵyndar demalys kúni kommýnaldyq, «Altyn bazar» jáne «Darııa» degen bazarlarynan aýdandardan ákelingen ónimdi arzan baǵaǵa ala alady», - deıdi Soltústik Qazaqstan oblysy aýyl sharýashylyǵy jáne jer qatynastary basqarmasynyń basshysy Meıram Meńdibaev.

Tek qyzyljar aýdanynan ǵana kásipkerler 50 tonna azyq-túlik, 100 tonnaǵa jýyq jem-shóp ákelgen.

«Sıyr, qus etin ákeldik, sút ónimderi bar. Aýdanymyzda birneshe qus fermasy bar, sol sebepti jumyrtqany kóp ákeldik.

Qyryqqabattyń kelisin 80 teńgeden, kartopty 100 teńgeden, qus etiniń kelisi 1100 teńeden, sıyr eti 1800 teńgeden satyp jatyrmyz. Deldaldarsyz óndirýshilerdiń ózderi ákelip satyp jatqandyqtan baǵa anaǵurlym arzan. ıAǵnı kóterme baǵamen turǵyndar ala alady.

Jalpy aýdan boıynsha 300-ge jýyq taýar óndirýshi bar. Olardyń 50 shaqtysy – JShS-ler. Búgin solardyń 15-i jármeńkege qatysyp jatyr», - deıdi Qyzyljar aýdany ákiminiń orynbasary Dáýren Shaqanov.

Al Jumysshy kentinde mal azyǵy – jem-shóp, saban saýdalanyp jatyr. 300 kg bir orama shóp 5 myń teńge turady. Osyndaı sabandy 2 myń teńgeden alýǵa bolady.

SQO aýyl sharýashylyǵy jáne jer qatynastary basqarmasynyń málimetinshe, byltyr osyndaı aýyl sharýashylyǵy jármeńkesinde shamamen 500 mln teńgeniń ónimi satylǵan.