Petropavldaǵy atysqandardyń soty jabyq kúıde ótedi
PETROPAVL. QazAqparat - Shilde aıynda Soltústik Qazaqstan oblysynyń qylmystyq ister jónindegi aýdanaralyq mamandandyrylǵan sotyna oblystyq balalar aýrýhanasynyń mańynda bolǵan atys deregi boıynsha qylmystyq is kelip tústi, dep habarlaıdy «QazAqparat» HAA tilshisi oblystyq sottyń baspasóz qyzmetine silteme jasap.
«Sotqa deıingi tergeý organdary bes sottalýshyny bopsalaýshylyq, kámelettik jasqa tolmaǵandardy aýyr jáne asa aýyr qylmysqa tartý, aldyn ala kelisim boıynsha atys qarýlaryn zańsyz berý, ustaý jáne saqtaý, buzaqylyq jáne Erbol Hamıtovtyń ómirine qastandyq jasaý boıynsha aıypty dep tanyp otyr. Sottalýshylardyń biri kámelettik jasqa tolmaǵandyqtan, atalǵan qylmystyq iske qatysty sot talqylaýy jabyq kúıde ótedi», - dedi oblystyq sottyń baspasóz hatshysy Dınara Tólengitova.
Aıta keteıik, 28 shilde kúni shamamen tańǵy saǵat 4-te Petropavldaǵy túngi klýbtardyń biriniń aldynda jastar arasynda janjal týyndaǵan bolatyn. Ol kezde Erbol Hamıtov kishigirim jaraqat alǵan. Kelesi kúninde janjal oblystyq balalar aýrýhanasy mańynda jalǵasyn tapqan. Saldarynan Erbol Hamıtovtyń bytyra jaraqatyn alǵan aıaǵyn kesip tastady. Oqıǵa qatysýshylary qylmys ornynan izderin jasyrǵan. Atys jeke úıge ornatylǵan baqylaý kamerasyna túsip qaldy. «Quryqtaý» jospary jarııalanyp, avtokólik ustaldy. Pnevmatıkalyq tapansha men eki sholaq myltyq tárkilendi. Kólikte bolǵan úsheýdiń bireýi kámelettik jasqa tolmaǵan bolyp shyqty. Qalǵan ekeýi keıinnen qolǵa tústi.
