Petropavldaǵy ardagerler hory 35 jyldyq mereıtoıyn atap ótti
PETROPAVL. QazAqparat – Petropavl qalasynda 1984 jyly qurylǵan eńbek jáne soǵys ardagerleriniń halyqtyq akademııalyq hory 35 jyldyq mereıtoıyn sahnada, kórermenderiniń arasynda atap ótti, dep habarlaıdy QazAqparat tilshisi.
Bastapqyda hor quramyna negizinen Ekinshi Dúnıejúzilik soǵys ardagerleri kirdi. Óner ujymy halyqtyń súıispenshiligine bólenip, kontserttik baǵdarlamamen oblys aýmaǵynda ǵana emes, el boıynsha gastroldik saparlarǵa shyqty. 2010 jyly ardagerler hory astanada Jeńistiń 65 jyldyǵyna arnalǵan saltanatty is-sharaǵa qatysty. Olar túrli qalalyq, oblystyq baıqaýlardyń laýreattary.
«Búgingi mereıtoılyq kontsertte biz tek ózimizdiń 7 ánimizdi oryndaımyz. Biraq repertýarymyz úlken. Buryn tek soǵys, jeńis týraly án shyrqasaq, qazir basymdyqty klassıkalyq janrǵa beremiz. Hor qurylǵaly onyń quramy birneshe ret aýysty. 90 adamǵa deıin jetken kezderimiz boldy. Qazir ujymda 32 adam bar», - deıdi ujymnyń kórkemdik jetekshisi Ivan Mışenko.
Ivan Mışenkonyń aıtýynsha, horda án aıtatyndardyń 8-i kásibı mýzykant. Ivan Alekseevıchtiń de negizgi mamandyǵy mýzykamen baılanysty. Ol M.I.Glınka atyndaǵy Novosibir konservatorııasyn hor ustazy mamandyǵy boıynsha bitirgen. 1995 jyly Elbasy N.Nazarbaevtyń jarlyǵymen oǵan QR mádenıetine eńbegi sińgen qaıratker ataǵy berildi.
Qazir ardagerleriniń halyqtyq akademııalyq horynyń repertýarynda 40-tan astam án bar. Olar: «Qazaqstanym meniń», «Smýglıanka», «Tanets v gorodskom sadý», «Sholpan», t.b. ánder.
«Hordyń músheleri shetinen ónerli, basqalarǵa úlgi bolarlyq jandar. Úılerinde, nemere-balalarynyń janynda otyryp qalmaı qoǵamdyq isterge belsene aralasady. Eńbek ujymdarynda, oqý oryndarynda kontsertter qoıady. Jastarynyń ulǵaıǵanyna qaramastan oblystyń aýdandaryna, kórshi óńirlerge gastroldik saparlarmen shyǵyp jatady. Búgingi merekelik keshke basqa da ardagerlerden quralǵan ansamblder qatysyp jatyr. Olarǵa da ardagerler men múgedekterdi qoldaý aılyǵy aıasynda qurmet kórsetip, eńbekterin baǵalap jatyrmyz», - deıdi Petropavl qalalyq ardagerler keńesiniń tóraǵasy Sara Tasemenova.
Mereıtoılyq keshke kelgen kórermenderden zalda ıne shanshar jer bolmady. Halyqtyq hor quttyqtaı kelgen qonaqtarǵa repertýarlaryndaǵy kópke tanymal ásem ánderdi usyndy.
