Petropavldaǵy apatta joǵalǵan áıeldi izdeýge astanalyq qutqarýshylar kómektesip jatyr

PETROPAVL. QazAqparat – Petropavl jylý-elektr ortalyǵyndaǵy opyrylyp túsken murja úıindisi tazartylyp jatyr, jumysshy áıel áli tabylǵan joq, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamentiniń bastyǵy Ramıl Kamalovtyń aıtýynsha, tótenshe jaǵdaılar mınıstrliginiń nusqaýymen Petropavlǵa qosymsha Nur-Sultan qalasynan qutqarýshylar keledi.

Ázirge óz kúshimen úıindi ornynda izdestirý jumystaryn atqaryp jatyr.

Joǵalǵan jumysshy - 1984 jyly týǵan áıel. Jylý ortalyǵynda mashınıst-qaraýshy bolyp jumys istegen. Kúıeýi de sonda eńbek etedi. 15 jasar balasy bar.

«Qazir apat ornynda 15-20 adamnan quralǵan toptar jumys istep jatyr. Olar saǵat saıyn aýysyp otyrady. Qazir izdestirý jumystaryna 60 shaqty adam tartylǵan. Epıtsentr 1300 sharshy metrdi alyp jatyr. Al mashınıst otyrǵan bólme 50 sharshy metrdi alǵan. Jumysshyǵa qatysty úmitimizdi úzbeımiz, aman tabylýy múmkin», - deıdi Ramıl Kamalov.