Petropavldaǵy aqyndar mektebi bir jylda 40 shaqty júlde alǵan
PETROPAVL. QazAqparat - Elimizde sońǵylardyń biri bolyp ashylǵan Petropavldaǵy aqyndar mektebi jyldy jaqsy jetistiktermen aıaqtaǵaly otyr. Ashylǵanyna bir jyl bolǵan ortalyq tárbıelenýshileri osy aralyqta túrli deńgeıdegi baıqaýlardan 40 shaqty júlde aldy, dep habarlaıdy QazAqparat.
Aqyndar mektebi - boıynda aqyndyq qabileti bar, óleń-jyrǵa qumar oqýshylarǵa 2017 jyldyń qyrkúıek aıynda óz esigin aıqara ashqan bolatyn. Sodan beri ortalyq óleń álemine qanat qaǵyp, qalam terbegen 40 jas aqyndy bir arnaǵa biriktirdi. Aıtysker aqynnyń til tazalyǵyn saqtap, jan-jaqty bilimdi bolýy mańyzdy. Tálim alýshylar Jarqyn Juparhan, Amanjol Zaǵypar, Farhat Tastambek, Amangeldi Ramazanov, Batyrbek Shambetovten bes baǵyt boıynsha dáris alyp keledi. Ustazdary olardy aıtyskerlikke, aqyndyqqa, sheshendik ónerge baýlıdy, maqamǵa úıretip, mánerlep oqý, sahna mádenıetinen dáris berýde.
«Balalardy aýdandardy aralap júrip, baıqaý ótkizip iriktep aldyq. Keıin Petropavldaǵy Á.Dosmuhambetov atyndaǵy daryndy balalarǵa mamandandyrylǵan mektep-ınternatyna joldama berdik. Olar esh emtıhansyz qabyldandy. 6 balamyz jergilikti ýnıversıtette oqıdy. Onyń bireýi rektordyń grantyn jeńip alyp, qazaq tili jáne ádebıeti fakýltetinde tegin bilim alyp jatyr. 9 bala M.Jumabaev atyndaǵy kolledjde oqıdy»,- deıdi ortalyq jetekshisi, aıtysker aqyn Jarqyn Juparhan.
Aralarynda top jarǵan balalar da jeterlik. Solardyń biri - Á.Dosmuhambetov atyndaǵy daryndy balalarǵa mamandandyrylǵan mektep-ınternattyń 10-synyp oqýshysy Aıaǵan Dıas. 15 jastaǵy bozbala Esil aýdany Aqtas aýylynyń týmasy. Oblystyq, respýblıkalyq aqyndar aıtysynda 10-nan astam júldege ıe boldy. «Bulaq kórseń, kózin ash» degendeı, bul mekteptiń ashylý maqsaty - jastardy aıtys ónerine tartý, tárbıeleý, durys baǵyt-baǵdar berý, qazaqtyń tól ónerin dáripteý.
Jarqyn Juparhannyń aıtýynsha, Petropavl qalasynda buryn aqyndar mektebi bolmaǵan. Respýblıkada sońǵylardyń biri bolyp ashylyp otyr. Mysaly, Qaraǵandy oblysynda mundaı ortalyqtyń jumys istep jatqanyna 20 jyldan assa, bir Pavlodardyń ózinde 3 aqyndar mektebi bar eken.
