Petropavldaǵy Abylaı han rezıdentsııasy bıyl jóndeýden ótti
PETROPAVL. QazAqparat – Petropavldaǵy respýblıkalyq mańyzy bar «Abylaı han rezıdentsııasy» mýzeı kesheni bıyl ǵylymı-restavratsııalaýdan ótti. Bul maqsatqa 21,1 mln teńge jumsaldy, dep habarlaıdy QazAqparat tilshisi.
Halyq arasynda Abylaıdyń «aq úıi» atanyp ketken nysanǵa sońǵy ret eki jyl buryn jóndeý jasalǵan eken. Ol joly ǵımarattyń mańaıy jónge keltirilgen.
SQO mádenıet, tilderdi damytý jáne arhıv isi basqarmasynyń málimetinshe, «Abylaı han rezıdentsııasy» mýzeı kesheni respýblıkalyq mańyzy bar qala qurylysy jáne sáýlet eskertkishi sanalady, 2008 jyly memlekettik qorǵaýǵa alynǵan.
«Tarıh jáne mádenıet eskertkishterinde ǵylymı-restavratsııalaý jumystaryn júrgizý josparyna, sondaı-aq Qazaqstan Respýblıkasynyń 2021-2030 jyldarǵa arnalǵan mádenıet saıasaty tujyrymdamasyna sáıkes, bıyl jaz aılarynda eskertkishte ǵylymı-restavratsııalaý jumystary júrgizildi. Jóndeýdi Mádenıet jáne sport mınıstrliginiń tapsyrysy boıynsha «Qazqaıtajańǵyrtý» sharýashylyq júrgizý quqyǵyndaǵy RMK-nyń Batys Qazaqstan fılıaly atqardy. Qalpyna keltirý jumystaryna respýblıkalyq bıýdjetten 21,1 mln teńge bólindi», - deıdi SQO mádenıet, tilderdi damytý jáne arhıv isi basqarmasy basshysynyń orynbasary Nurlan Jamantaev.
Nátıjesinde Abylaı han rezıdentsııasynyń tóbesindegi qorǵanys qorshaýy syrlandy, shatyry ishinara aýystyryldy jáne ondaǵy terezeler qalpyna keltirildi. Birinshi qabattaǵy bólmeler men dáliz tolyq jóndeldi, ekinshi qabatqa kóteriletin baspaldaqtyń mármár granıty aýystyrylyp, ǵımarattyń syrtqy qasbeti syrlandy.
Abylaı han rezıdentsııasy qala-oblys turǵyndarynyń maqtanyshyna aınalǵan. Óńirge kelgen qonaqtar Abylaıdyń aq úıine bas suǵyp, ulttyq tarıhı eskertkishpen tanysýdy mindet sanaıdy. Qazirgi ýaqytta mýzeı keshende Abylaıǵa qatysty jáne qazaqtyń baıyrǵy turmys-saltynan syr sherter 600-den astam jádiger saqtalǵan.
Foto: tuganjer.skolib.kz
