Petropavldaǵy 30 shaqty saıajaı qoǵamy sý astynda qalýy múmkin
PETROPAVL. QazAqparat – Petropavldaǵy 136 saıajaı qoǵamynyń otyzdan astamy kóktemgi sý tasqyny kezinde zardap shegýi múmkin, dep habarlaıdy QazAqparat tilshisi.
Petropavlda 136 baý-baqsha seriktestigine 47 myń saıajaı ýchaskesi birikken. Olardyń bir bóligi kólderdiń jáne Esil ózeniniń mańyna ornalasqan. Bıyl bul ýchaskeler sý astynda qalýy múmkin.
Petropavl mańyndaǵy saıajaılarda turatyndardyń biri - Anastasııa Zaharova. Onyń úıine jylda sý kiredi. Byltyr kóktemde sý tasqynynan keıin «Qyzyl Jarty aı» qoǵamy qarjylaı kómektesip, saıajaıyn jónge keltiripti.
«TJD mamandary bizge kún jylyna bastaǵannan kelip, aldaǵy sý tasqyny jaıynda eskertýde. 1 sáýirge deıin kóshpek oıymyz bar. Sý tasqyny kelgenshe dúnıemizdi, malymyzdy qaýipsiz jerge shyǵaramyz», - deıdi Anastasııa Zaharova.
Petropavl qalalyq tótenshe jaǵdaılar basqarmasynyń málimetinshe, 15 aqpan men 15 naýryz aralyǵynda saıajaı turǵyndary úshin aılyq ótkizildi. Іs-shara barysynda qaýipti aımaqta ornalasqan saıajaılarda 242 turǵyn turatyndyǵy anyqtalǵan. Alaıda olardyń jartysyna jýyǵy mamandardyń eskertýinen keıin kóship ketken.
«Saıajaı turǵyndarymen jumysty toqtatqan joqpyz. Kúndelikti aralap, jaǵdaılarymen tanysyp, saqtyq sharalary jaıynda aıtamyz. Aıdyń basynda saıajaılarda 242 adam tursa, qazir olardyń 172 ǵana qaldy», - deıdi Petropavl qalalyq Tótenshe jaǵdaılar basqarmasynyń azamattyq qorǵanys tobynyń ofıtseri Álibek Borambaev.
SQO TJD aldaǵy 21-22 naýryz kúnderine eskertý jarııalady. Mamandardyń aıtýynsha, aýa temperatýrasynyń joǵarylaýyna jáne jaýyn-shashynǵa baılanysty óńirdegi ózenderde muz erip, sý deńgeıiniń kóterilýi boljanǵan.
