Petropavldaǵy 19 kóp qabatty úıdiń qubyry qatyp qaldy
Tótenshe jaǵdaıdy joıý úshin «Qyzyljar sý» JShS-nyń barlyq brıgadalary men tehnıkasy jumyldyrylǵan. Jylytý boıynsha jumystar jalǵasyp jatyr. «Qyzyljar sý» brıgadalary sý tasymalyn uıymdastyrdy. Olar búginnen qaldyrmaı jaǵdaıdy retteýge ýáde berip otyr.
Mamandar buǵan qardyń juqa bolǵany jáne jerdiń úsh metrden astam tereńdikke sheıin qatýy sebep bolǵanyn aıtady. Qubyrlar negizinen túnde, sý júrý toqtaǵanda qatady.
Keshe Petropavldaǵy 11 kóp qabatty úı men jeke sektor úılerinde qubyrlar qatyp qalǵan edi. Olardy jylytyp, aýyz sý berý qalpyna keltirildi.
Petropavl ákimdiginiń baspasóz qyzmeti áleýmettik jelide osy máselede qala turǵyndary júginýine bolatyn telefon nómirlerin taratty.
Soltústik Qazaqstan oblysynda birneshe kúnnen beri aıaz kúsheıdi. Mektepterde sabaqtar toqtatylǵan. Jol-patrýl qyzmetteri kúsheıtilgen rejimdegi jumysqa kóshken. Oblystyq TJD qysqy tótenshe jaǵdaılardyń saldaryn joıý úshin jedel shtab qurdy.
