Petropavldaǵy jetkinshekter úıi bıyl 72 mln teńgege jóndeldi
PETROPAVL. KAZINFORM — Petropavldaǵy jetkinshekter úıi 20 jyldan astam ýaqyt ishinde jetim jáne ata-anasynyń qamqorlyǵynsyz qalǵan 700-den astam bozbala men boıjetkenge pana bolyp, ómirge beıimdedi. Qazirgi ýaqytta bul úıde 24 adam turyp jatyr.
Balalar úıleri men otbasylyq úlgidegi balalar aýylynyń túlekteri úlken ómirge aıaq baspas buryn jetkinshekter úıine ornalasady. Petropavldaǵy 2001 jyly ashylǵan erekshe mekeme arqyly osy ýaqyt aralyǵynda 727 bozbala men boıjetken ótken.
Mekeme dırektory Juqash Qosybaevtyń aıtýynsha, jetkinshekter úıi 52 tárbıelenýshige arnalǵan. Ǵımaratta 20 bir bólmeli jáne 4 eki bólmeli páter bar.
«Barlyq páter turmysqa qajet jıhazben tolyq qamtylǵan. As bólmesinde elektr peshi, tońazytqysh, shkaf, ústel-oryndyqtar bar. Sanıtarlyq bólme biriktirilgen, turmystyq bólme kir jýatyn mashınalarmen qamtylǵan. Jastarǵa yńǵaıly bolýy úshin bar jaǵdaı jasalǵan», — deıdi Juqash Qosybaev.
Jetkinshekter úıinde 18 ben 23 jas aralyǵyndaǵy boıjetken-bozbalalar tura alady. Mekemeniń maqsaty — balalar úıinen shyqqan jasty áleýmettendirý, ózdiginen ómir súre alatyndaı etip beıimdeý. Al olarǵa osyndaǵy pedagogtar men mekeme qyzmetkerleri jol kórsetip, aqyl-keńes beredi.
«Balalardy tárbıeleý men oqytýdy memleket tolyqtaı óz moınyna alǵan. Ákimshilik tarapynan tárbıelenýshilerge, onyń ishinde burynǵy tárbıelenýshilerge de turǵyn úı, eńbek, ákimshilik quqyq máseleleri boıynsha zańgerlik konsýltatsııalyq kómek kórsetiledi. Al qoǵamǵa, ómirge beıimdeýde, turmysta qajetti daǵdylardy meńgerýde pedagogtar kómektesip, kúndelikti jumys atqarady. Balalardyń barlyǵy memlekettik shákirtaqy alady, tamaqtanýǵa járdemaqy beriledi. Tárbıelenýshilerdiń bir bóligi asyraýshysynan aırylýyna baılanysty áleýmettik kómek alady», — deıdi mekeme dırektory.
Qazirgi ýaqytta jetkinshekter úıinde 11 bozbala jáne 13 boıjetken turyp jatyr. Olardyń tórteýi jergilikti ýnıversıtette, beseýi kolledjderde oqysa, qalǵany jumys isteıdi.
«Byltyr Jetkinshekter úıiniń materıaldyq-tehnıkalyq bazasyn nyǵaıtýǵa 35 mln teńgege jýyq qarajat bólindi. Ol qarajatqa jıhazdy, turmystyq tehnıkany, perdelerdi jańaladyq. Beınebaqylaý júıesin aýystyrdyq. Bıyl 72,5 mln teńge shamasynda bólindi. Ol aqshaǵa bólmelerge aǵymdaǵy jóndeý júrgizildi, sanıtarlyq bólmeler jónge keltirildi», — deıdi Juqash Qosybaev.
Jastar memlekettik turǵyn úı qorynan baspana alýǵa kezekte tur. Jıyrma jyldan astam ýaqyt ishinde mekemeniń tek 97-i tárbıelenýshisi Petropavldan jaldamaly-kommýnaldy páterge qol jetkizgen. Taǵy toǵyzy oblystyń aýdandarynan baspanaly boldy.
Buǵan deıin SQO-da aýyl turǵynynan 500 lıtrge jýyq spırttik ónim tárkilengenin jazǵan edik.