Petropavldaǵy JEO-2 nysandaryna avtomattandyrylǵan monıtorıng júıeleri ornatyldy
PETROPAVL. KAZINFORM – Jańa júıe Ekologııalyq kodekske saı ornatyldy jáne qazir synaq rejıminde jumys istep jatyr.
«Sevkazenergo» AQ baspasóz qyzmetiniń málimetinshe, kásiporyn avtomattandyrylǵan monıtorıng júıelerin merdigerden resmı qabyldaýdy áli tolyq aıaqtaǵan joq.
Jabdyqtar Petropavl 2-Jylý elektr ortalyǵynyń úsh negizgi nysanyna: Esil ózenine quıatyn sý qubyryna, №3 tútin murjasyna jáne jańadan salynǵan tútin murjasyna ornatyldy. Sýdyń sapasy naqty ýaqytta baqylanady.
- Jobanyń eń basty bóligi – Esil ózenine aǵatyn sý qubyryna avtomattandyrylǵan sý monıtorıngi júıesin ornatyp, iske qosý boldy.
Qazir bul júıe synaq rejıminde jumys istep tur jáne ol Beloe kólinen keletin sýdyń sapasyn baqylaý úshin qoldanylady.
Ornatylǵan jabdyq naqty ýaqyt rejıminde negizgi kórsetkishterin - sý shyǵynyn, temperatýrany, sýtegi kórsetkishin, elektr ótkizgishtikti, laılaný deńgeıin kórsetedi, - deıdi «SEVKAZENERGO» AQ qorshaǵan ortany qorǵaý basqarmasynyń basshysy Nıkolaı Maksımov.
Mamannyń aıtýynsha, ár 20 mınýt saıyn alynǵan derekter óńdelip, muraǵattalady jáne avtomatty túrde «Qorshaǵan ortany qorǵaýdyń ulttyq derekter banki» aqparattyq júıesine jiberiledi. Bul aqparat 5 jylǵa deıin saqtalady.
Tútin murjalaryna ornatylǵan júıeler de iske qosylǵan. Olar arqyly kásiporyn atmosferaǵa shyǵarylatyn zııandy zattardyń kólemin táýlik boıy baqylaı alady. Bul – belgilengen ekologııalyq talaptardyń saqtalýyn qamtamasyz etedi.
- Bul – ekologııalyq ashyqtyq pen jaýapkershilikke baǵyttalǵan mańyzdy qadam. Ornatylǵan júıeler belgilengen normalardyń qatań saqtalýyn qamtamasyz ete otyryp, lastaýshy zattardyń shyǵaryndylarynyń kólemin táýlik boıy baqylaýǵa múmkindik beredi, — deıdi Nıkolaı Maksımov.
Buǵan deıin Petropavl JEO-2-niń jańa tútin murjasy iske qosylǵanyn jazǵan edik.