Petropavldaǵy jańa qoqys polıgony 35 jylǵa paıdalanýǵa berilmek
PETROPAVL. KAZINFORM – Petropavlda jańa qoqys polıgonyn salýǵa qajetti qujattardyń basym bóligi alyndy.
Soltústik Qazaqstan oblysy ekologııa departamentiniń málimetinshe, jer ýchaskesine jyljymaıtyn múlik obektisiniń kadastrlyq pasporty alyndy.
Búgingi kúni sondaı-aq, qorshaǵan ortaǵa áserdi baǵalaýdyń oń qorytyndysy alyndy. Endi keshendi ekologııalyq ruqsat alý úshin qajetti qujattar ázirlenip jatyr.
Petropavldyń turmystyq qaldyqtardy qabyldaıtyn jańa polıgony Mamlıýt tas joly boıynda ornalasady. Osy maqsatqa 30 ga aýmaq bólingen. Joba boıynsha polıgon 35 jyl jumys isteýge eseptelgen, al jalpy jobalyq qýaty - 4,38 mln tonnadan asady.
Jańa polıgon aýmaǵynda turmystyq qaldyqtardy óńdeıtin zaýyt salý josparlanǵan. Kásiporynnyń jobalyq tehnologııalyq qýaty jylyna 100 myń tonna bolady.
Petropavldaǵy qoldanystaǵy qatty turmystyq qaldyqtar polıgony 1996 jyly ashylǵan. Búginde onyń resýrsy tolyq aıaqtaldy. Qala basshylyǵy jańa nysan qurylysyna daıyndyq júrgizilip jatqan aralyqta qoldanystaǵy polıgonnyń qýatyn qosymsha 10% ulǵaıtty.
Jalpy, qazir SQO-da qaýipti emes qaldyqtardy jınaý, tasymaldaý jáne kádege jaratýmen 57 uıym aınalysady.
Buǵan deıin Soltústik Qazaqstan oblysy Beskól aýylynyń mańyndaǵy orman alqaptaryna turmystyq qaldyqtar tógilip jatqanyn jazǵan edik.
