Petropavldaǵy Zarechnyı kentinen 90 otbasy jaqynda jańa páterge kóshedi

PETROPAVL. KAZINFORM — Petropavlda kóktemgi sý tasqynymen kúresý úshin turǵyzylǵan bógetterdi nyǵaıtý jumysy aıaqtaldy. 

Búgin Petropavl ákimi Serik Muhamedıev brıfıngte atqarylyp jatqan jumystardan habardar etti.

Ákimniń aıtýynsha, kóktemgi sý tasqynynyń aldyn alý boıynsha aýqymdy jumys atqaryldy. Sońǵy eki jylda qolǵa alynǵan sharalardyń arqasynda bıyl kóktemde Esil tasyǵanymen, turǵyn úıler men áleýmettik nysandardy sý basqan joq.

— Bıyl aınalma arna qaıta jańartyldy. Sondaı-aq sýmen jabdyqtaý júıesiniń birinshi kótergish stantsııasy tolyq jańǵyrtyldy. Bógetter nyǵaıtyldy. Qazirgi kezde Oıqala shaǵyn aýdanyndaǵy topyraq úıindisin qosymsha kóterý, Bylǵary zaýyty shaǵyn aýdanynda beton plıtalary arasyndaǵy jikterdi jabý jumystary júrgizilip jatyr. Bul nysandar keler jyldyń kóktemine tolyq daıyn bolady, — dedi Serik Muhamedıev.

Úılerdi sý shaıyp ketken Oıqala jáne Bylǵary zaýyty shaǵyn aýdandarynda aýdan ákimdikteri men kásipkerlerdiń kómegimen 74 skver paıda boldy. Qazir munda «Qazaqstan halqyna» qorynyń kómegimen fýtbol oınaıtyn eki sport nysany salynyp jatyr.

— Jyl sońyna deıin Zarechnyı kenti turǵyndarynyń bir bóligi kóshiriledi. 162 páterden turatyn jańa úıler «Jas Órken» jáne «Ortalyq» sııaqty qarqyndy damyp kele jatqan shaǵyn aýdandarda turǵyzylyp jatyr. Onyń 90-ny jeltoqsan aıynyń basynda berile bastaıdy. Qalǵan páterlerdi kelesi jyldyń maýsymynda paıdalanýǵa berýdi josparlap otyrmyz. Nátıjesinde jyl saıyn sý basý qaýpi joǵary aýdannan turǵyndardy kóshiremiz, — dedi qala ákimi.

Buǵan deıin Aqtóbede sý tasqyny qaýpi bar aımaqtarda qaýipsizdik sharalary kúsheıtilgenin jazǵan edik.