Petropavldaǵy Zarechnyı kentindegi bóget sarbazdardyń kómegimen nyǵaıtylyp jatyr
PETROPAVL. KAZINFORM – Petropavldaǵy Zarechnyı kenti tasyǵan Esil ózeniniń sýy basýy múmkin qaýipti aýmaqtardyń biri. Sýdyń eldi mekenge kirýin boldyrmaý úshin qazir mundaǵy bóget nyǵaıtylyp jatyr.
Petropavldaǵy Zarechnyı kentinde 900-den astam adam turatyn 224 turǵyn úı bar. Esil ózeni qatty tasyǵan jyldary jaıylǵan sý kóshe men shetkeri úılerge kiredi. Tasyǵan sýdyń jolyna birer jyl buryn bóget salyndy, bıyl ol nyǵaıtylyp jatyr. Bul jumysqa QR Ulttyq ulan 6637 áskerı bóliminiń 60 sarbazy men onnan astam tehnıka jumyldyrylǵan.
«Kóktem bastalǵaly anamnyń úıinde turyp jatyrmyn, sebebi, úıge sý kire me, degen qorqynysh bar. Sońǵy ret 2017 jyly sý qatty tasyp, deńgeıi belden kelgen. Bóget turǵyzylǵannan keıin jaǵdaıymyz jaqsardy, bóget sýdyń ótýine kedergi jasaıdy», - deıdi Petropavl turǵyny Nıkolaı Lıýkov.
Áskerıler bógetti nyǵaıtý úshin sary balshyq pen qumnyń qospasy salynǵan qapshyqtardy daıarlap jatyr. Bógettiń uzyndyǵy 1,5 kılometr, al bıiktigin 2,5 jarym metrge jetkizbek. Bir aptanyń ishinde alty myńnan astam qap ázirlendi.
Buǵan deıin Esil ózeni sý deńgeıiniń kóterilip kele jatqanyn aıtqan edik.
Sondaı-aq búgin oblystyq, aýdandyq mańyzy bar 15 avtojoldy sý shaıyp ketti.
