Petropavldaǵy Zarechnyı kentinde adamnyń bas súıekteri shashylyp jatyr
PETROPAVL. KAZINFORM — Adamnyń súıekteri qazba jumystarynan keıin jerge shyǵyp qalǵan.
Bul týraly qoǵam belsendisi Tólegen Imanov áleýmettik jelidegi paraqshasynda jarııalady.
Petropavldyń baıyrǵy turǵyny, arheolog-ǵalym Anatolıı Pleshakovtyń aıtýynsha, Zarechnyı kentinde buryn zırat bolǵan. Kópshilik ol týraly bile bermeıdi.
— Bul qorymǵa qaıtys bolǵan sottalǵandardy 1960 jyldardyń basyna deıin jerlegen. Biraq kim jerlense de, súıekterdiń bulaı shashylyp jatýy durys emes. 1934 jyldary bul jerde baraktar turdy, repressııaǵa ushyrap, atý jazasyna kesilgenderdi de osynda jerledi, — deıdi Anatolıı Pleshakov.
Zırat bolǵanyn ár jerde turǵan belgilerden de kórýge bolady.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl qalasynyń polıtsııasyna Zarechnyı shaǵyn aýdanynda adam súıekteriniń tabylǵany týraly habar túsisimen oqıǵa ornyna birden mamandar jiberildi.
— Jedel-tergeý tobynyń qyzmetkerleri adam súıegi fragmentterin alyp, mán-jaıdy anyqtaý úshin sot-medıtsınalyq saraptamaǵa jiberdi. Aldyn ala málimetter boıynsha, zorlyq-zombylyqpen ólý belgileri anyqtalǵan joq. Tekserý júrgiziledi. Onyń nátıjeleri boıynsha qoldanystaǵy zańnamaǵa sáıkes protsestik sheshim qabyldanatyn bolady, — delingen vedomstvonyń jaýabynda.
Buǵan deıin Petropavlda er adamnyń ústine benzın tógilip, tirideı janyp kete jazdaǵanyn jazǵan edik.