Petropavldaǵy Ulttyq ulan akademııasyndaǵy tóbelesten birneshe adam jaraqat aldy
PETROPAVL. KAZINFORM – Petropavldaǵy Qazaqstan Respýblıkasy Ulttyq ulany akademııasynda birinshi kýrs kýrsanttary tóbelesti.
Bul týraly aqparat jergilikti pablıkterdiń birinde paıda boldy. Mundaǵy málimet boıynsha, janjalǵa 41 adam qatysqan. Aralarynda osy oqý ornynda oqyp jatqan Tájikstan Respýblıkasynyń azamattary da bar.
Bul faktini QR Ulttyq ulany akademııasynyń baspasóz qyzmeti rastady.
– Petropavldaǵy Ulttyq ulan akademııasynda bolǵan birinshi kýrs kýrsanttary arasyndaǵy qaqtyǵys faktisi boıynsha tekseris júrip jatyr. Oqıǵa nátıjesinde birneshe kýrsant jeńil dene jaraqattaryn alǵan. Olarǵa tıisti medıtsınalyq kómek sol jerde kórsetildi, aýrýhanaǵa jatqyzý qajettiligi bolmady. Qazirgi ýaqytta oqıǵanyń sebep-saldary anyqtalyp jatyr, - dep jaýap berdi baspasóz qyzmetinen.
Buǵan deıin SQO-da jasóspirimder qylmysy 20 paıyzǵa azaıǵanyn jazǵan edik.