Petropavldaǵy tergeý ızolıatoryna «Kezek-online» pılottyq jobasy engizilip jatyr
PETROPAVL. KAZINFORM — Jańa elektrondy kezek júıesi tergeý ızolıatoryna barýdy yńǵaıly jáne qaýipsiz etýdi maqsat etken.
Soltústik Qazaqstan oblystyq prokýratýrasynyń málimetinshe, bul — SQO qylmystyq-atqarý júıesi departamentimen birlesip júzege asyryp jatqan joba.
Buryn kelýshiler tańerteń erte, tipti qarańǵyda kelip kezekke turýǵa, qaǵaz ótinishterdi toltyrýǵa jáne jeke maquldaýlar men anyqtamalar alýǵa májbúr boldy. Bul ýaqytty alyp, kelýshiler arasynda janjal týǵyzyp, azamattar narazylyǵyn bildirip jatatyn.
Endi tergeý ızolıatoryna kelmeı aq táýlik boıy Qazaqstannyń jáne álemniń kez kelgen jerinen onlaın tirkelýge bolady. Kezek avtomatty túrde qalyptasady.
— Ótinishter onlaın rejıminde beriledi jáne kelisiledi, barlyq bólimsheler derekterdi avtomatty túrde alady, al bastyq ótinishti elektrondy túrde bekitedi. Anyqtamalar men qujattardy endi jeke barmaı-aq qashyqtan alýǵa bolady. Mekemeniń jumys kestesi, mereke kúnderi, tapsyrystarǵa shekteýler jáne kelý erejeleri týraly barlyq aqparat qosymshada qoljetimdi, — deıdi prokýratýra qyzmetkerleri.
Budan bólek, rush-habarlandyrýlar men avtoaqparat sapar ýaqytyn, ótinim quzyry jáne qabyldaý pýnktteriniń júktemesin eske salady.
— Jasandy ıntellekt elementterin qosa otyryp, odan ári tsıfrlandyrý jáne avtomattandyrý josparlanǵan. «Kezek-online» arqyly budan bylaı kelip, kezekke turý qajet emes. Tergeý ızolıatoryna kelý barlyǵyna yńǵaıly, qaýipsiz jáne ashyq bolady, — deıdi mamandar.
Buǵan deıin Qyrǵyzstan men Ózbekstan shekarasynda elektrondy kezek júıesi engizilgenin jazǵan edik.