Petropavldaǵy tarıhı eskertkish – kópes Strelovtyń úıinde jóndeý jumysy bastaldy
PETROPAVL. KAZINFORM – Soltústik Qazaqstan oblystyq tarıhı-ólketaný mýzeıi ýaqytsha jabylyp, bir kezderi kópesterdiń úıi men dúkeni ornalasqan ǵımaratta kúrdeli jóndeý bastaldy.
Petropavldaǵy oblystyq tarıhı-ólketaný mýzeıiniń ǵımaraty XIX ǵasyrdyń sońynda salynǵan oblystyq mańyzy bar tarıhı jáne mádenı eskertkish. Jalpy aýdany – 2,4 myń sharshy metr, onyń 2 myń sharshy metri kórme zaldaryna arnalǵan. Sońǵy ret ǵımaratta qalpyna keltirý jumystary 2005 jyly júrgizilgen. Bıyl shatyrdy jóndeý, jylý, sý jáne káriz júıelerin jańartý josparlanǵan.
Qyzyl kirpishten salynǵan, sáýleti erekshe eki qabatty ǵımarat Petropavldyń ortalyǵynda, Qazaqstan Konstıtýtsııasy kóshesinde ornalasqan.
- Revolıýtsııaǵa deıin baı saýdagerlerdiń úıleri men dúkenderi qalanyń negizgi kelbetin aıqyndady. Olar qabyrǵalaryn myqty etip kirpishten nemese aǵashtan, ádemi oıý-órnektermen bezendirilip salynǵan. Baı saýdagerlerdiń úıleri kóbine eki qabatty etip salynyp, keń bólmelerimen, úlken terezelerimen jáne ekinshi qabattaǵy balkonmen erekshelendi. Sol kezeńniń taǵy bir ereksheligi – baılar úılerine dúıenderin, keńselerin, sharýashylyq ǵımarattardy japsarlas saldy. Sondaı-aq keıin urpaǵyna qyzmet etetindeı etip sapaǵa asa mán berdi, - deıdi oblystyq tarıhı-ólketaný mýzeıiniń bólim meńgerýshisi Tatıana Lanşıkova.
Strelovtar Petropavldaǵy eń tanymal saýdagerlerdiń biri bolǵan. Keshendi 1891 jyly Voznesenskıı kóshesinde Mavra Strelova jubaıy qaıtys bolǵannan keıin salady. Eki balamen qalǵan ol kúıeýiniń isin jalǵastyryp, jún, qoı jáne eshki ónimderimen saýda jasaǵan. Keıin isi órge basyp, «M.F. Strelova men uldary» jáne 1903 jyly «Strelovtar men Korsakov» atty saýda seriktestikterin ashady.
Mýzeı qyzmetkeriniń aıtýynsha, otbasy tek saýdamen shektelmeı, qalanyń qoǵamdyq ómirine de belsendi aralasqan. Ivan Strelov 1909–1917 jyldary qala keńesiniń múshesi boldy. Revolıýtsııa jáne azamat soǵysy bul otbasynyń da ómirin túbegeıli ózgertti.
Aǵaıyndylar Kolchak áskerine qosylyp, keıin 1930 jyly tutqyndalyp, ólim jazasyna kesildi. Qazir olardan taraǵan urpaq negizinen Reseıdiń Chelıabi qalasynda turyp jatyr.
Buǵan deıin Kerekýdegi ataqty Maıra án salǵan úıdiń tarıhy týraly jazǵan edik.
