Petropavldaǵy sýpermarket baǵany rýblmen kórsetken

PETROPAVL. KAZINFORM —  Petropavl qalasyndaǵy sýpermarketterdiń birinde taýardyń baǵasy ulttyq valıýta teńgemen emes, Reseı rýblimen kórsetilgen. Bul týraly Saýda jáne ıntegratsııa mınıstrliginiń baspasóz qyzmeti habarlady. 

Soltústik Qazaqstan oblysynda Petropavl qalasynyń turǵyny baǵa belgileý zańnamasynyń buzylýyna baılanysty Saýda jáne tutynýshylardyń quqyqtaryn qorǵaý departamentine shaǵymdandy. Onyń aıtýynsha, qaladaǵy sýpermarketterdiń birinde taýardyń baǵasy ulttyq valıýta teńgemen emes, Reseı rýblimen kórsetilgen.

Túsken ótinish negizinde departament mamandary saýda nysanyna jospardan tys tekseris júrgizdi. Tekserý barysynda zań buzýshylyq faktisi rastalyp, baǵa belgilerinde shetel valıýtasy kórsetilgeni anyqtaldy. Bul Qazaqstan Respýblıkasynyń zańnamasyna qaıshy, sebebi taýarlar men qyzmetterdiń baǵasy tek teńgemen kórsetilýi tıis.

— Tekserý nátıjesinde sýpermarket ıesi ákimshilik jaýapkershilikke tartyldy. Sonymen qatar, departament anyqtalǵan zań buzýshylyqtardy joıý týraly nusqama berip, saýda ornynyń basshylyǵyna baǵa belgilerin zań talaptaryna sáıkestendirýdi mindettedi.

Mundaı jaǵdaılar tutynýshylardy shatastyryp qana qoımaı, olardyń quqyqtaryn da buzady. Baǵanyń shetel valıýtasymen kórsetilýi esep aıyrysýda qıyndyqtar týǵyzyp, saýda oryndaryna degen senimsizdik qalyptastyrýy múmkin, — delingen mınıstrlik habarlamasynda.

Aıta ketelik aldaǵy merekeler qarsańynda bazarlarda baǵa baqylaýy kúsheıtiledi.