Petropavldaǵy sý burý arnasynyń qurylysy aıaqtalýǵa jaqyn
PETROPAVL. KAZINFORM – Bul kanal Esil ózeniniń sý aǵynyn basqa baǵytqa burýǵa arnalǵan.
Joba bıyl kóktemde Petropavldaǵy Zarechnyı kentinde qolǵa alyndy. Maqsat – tasyǵan Esil ózeni sýynyń ekpinin azaıtyp, buryp jiberý. Kanaldyń uzyndyǵy - 4,8 shaqyrym.
– Bıylǵy tasqyn ýaqytynda arnanyń tıimdiligi kórindi. Búgingi tańda úsh sý ótkizgishtiń qurylysy tolyq aıaqtalýǵa jaqyn. Olardyń ekeýi baý-baqsha aýmaqtaryna kedergisiz qatynaýdy qamtamasyz etse, úshinshisi elektr jetkizý jelisin qyzmet kórsetýge arnalǵan.
Odan bólek, qyrkúıek aıynda «Jemchýjnaıa vesna» baý-baqsha seriktestiginiń turǵyndary jeke qabyldaý barysynda joldardyń jaǵdaıyn jaqsartý jóninde ótinish bildirgen bolatyn. Qazirgi ýaqytta qalpyna keltirý jumystary júrgizilip jatyr, qarashanyń 10-na deıin tolyq aıaqtalady, - dedi Soltústik Qazaqstan oblysynyń ákimi Ǵaýez Nurmuhambetov.
Buǵan deıin SQO-da jylda qaıtalanatyn sý tasqynymen kúresý úshin qandaı jumys atqarylyp jatqanyn jazǵan edik.
Qazirgi ýaqytta óńirde 112 aýyl sý tasqyny men erigen qar sýynan zardap shegýi múmkin eldi mekender tizimine engen.