Petropavldaǵy sport mektep-ınternatynda 7-synyp oqýshysyna býllıng jasalyp kelgen
PETROPAVL. KAZINFORM – Soltústik Qazaqstan oblystyq olımpıadalyq rezervtiń mamandandyrylǵan mektep-ınternatynda joǵary synyp oqýshylary 7-synyp oqýshysyna álimjettik jasap kelgen.
Bul týraly áleýmettik jelide balanyń anasy jazdy.
Áıeldiń aıtýynsha, balasy Petropavldaǵy oblystyq sport mektep-ınternatynda oqıdy.
- Balam sportty jaqsy kóredi, 4 jasynan bastap aınalysyp júr. Osy oqý orny arqyly bıik belesterdi baǵyndyrmaqshy edi.
Eki apta buryn balamnyń mineziniń ózgergenin baıqadym. Buryn jıi beınebaılanysqa shyǵyp, bizben sóılesýdi jaqsy kóretin, sońǵy ýaqytta bizben osylaısha habarlasýdy toqtatty. Úıge áketýimizdi surady. Buǵan men tań qaldym. Osydan keıin balamyzdyń býllıngke ushyraǵanyn bildik, - deıdi Marjan.
SQO dene shynyqtyrý jáne sport basqarmasy osy oqıǵaǵa qatysty túsinik berdi.
- Olımpıadalyq rezervtiń mamandandyrylǵan mektep-ınternaty erkin kúres bóliminiń 7 «B» synyp oqýshysynyń anasy Marjan Tajımýratovadan onyń ulyna 8-synyp oqýshylary tarapynan býllıng jasalyp, dene jaraqattary keltirilgeni týraly shaǵym tústi.
Bul shaǵym boıynsha qyzmettik tekseris uıymdastyryldy. Tekserý aıasynda: jattyqtyrýshy-oqytýshylar quramynan, tárbıeshilerden, psıhologtan jáne oqıǵaǵa qatysýshylardan túsiniktemeler alyndy, yqtımal kýágerler suraldy, dene jaraqattaryn rastaıtyn medıtsınalyq qujattar suratyldy, quqyq qorǵaý organdary men SQO dene shynyqtyrý jáne sport basqarmasyna habar berildi, - delingen jaýapta.
Vedomstvo qazirgi tańda jaǵdaıǵa qatysy bar barlyq taraptardyń — quqyq qorǵaý organdary, psıholog, áleýmettik pedagog jáne ata-analardyń qatysýymen birlesken tekserý júrgizilip jatqanyn jetkizdi.
Mamandardyń aıtýynsha, tergeý nátıjesi boıynsha zańdy ári negizdelgen sheshim qabyldanatyn bolady.
Buǵan deıin Tarazda oqýshynyń anasyna balasynyń býllıng áreketi úshin aıyppul salynǵanyn jazǵan edik.