Petropavldaǵy iri saýda oryndarynda reseılik shujyq pen ósimdik maıynyń úlesi joǵary
PETROPAVL. KAZINFORM – Soltústik Qazaqstan oblysynyń qoǵamdyq keńesinde óńirdiń saýda jelileri men bazarlarynda satylatyn azyq-túlik ónimderiniń qaýipsizdigi men sapasy máseleleri qaraldy.
SQO boıynsha saýda jáne tutynýshylardyń quqyqtaryn qorǵaý departamentiniń basshysy Qanat Jeńisbekulynyń aıtýynsha, saýda ortalyqtaryna otandyq ónimdi sórelerge ornalastyrýǵa qatysty birqatar talap bar.
«Otandyq ónim turǵan sórede «Qazaqstanda jasalǵan» degen jazýy bolýy tıis. Sondaı-aq qazaqstandyq taýar azyq-túlik satatyn saýda alańynda jáne sórelerde keminde 30% alýy kerek. Otandyq ónim kózge kórinetin, qoljetimdi jerde ornalasady», - deıdi Qanat Jeńisbekuly.
Departament naryqtaǵy otandyq taýardyń úlesin anyqtaý úshin Petropavldaǵy iri saýda oryndaryna monıtorıng júrgizgen. Oǵan «Aimer», «Semeınyı», «Magnum», jáne «Severnyı» saýda jelileri qatysty.
«Qazaqstandyq sút ónimderi – sút, aıran, irimshik, qaımaqtyń úlesi «Aimer» saýda ortalyǵynda – 70%; «Semeınyı» – 47%; «Magnum» – 71%; «Severnyı» saýda ortalyǵynda 63% boldy. Sary maıdyń bul saýda jelilerindegi ortasha úlesi 80% shamasynda. Taýyq eti boıynsha da kórsetkish jaman emes, negizinen otandyq taýar saýdalanyp jatyr. Al ósimdik maıynyń úlesi - «Aimer» – 50%; «Semeınyı» – 66%; «Magnum» – 26%; «Severnyı» – 36%. Sol sııaqty shujyq ónimderi de az, «Aimer» – 36%; «Semeınyı» – 25%; «Magnum» – 43%; «Severnyı» – 33%», - deıdi departament basshysy.
Mamannyń aıtýynsha, azyq-túlik taýarlaryn satý naryǵyn taldaýdyń nátıjesinde sút ónimderi boıynsha qazaqstandyq ónim - 62% alsa, Reseıden ákelingen taýar – 36%, Belarýs ónimi 2% bolǵan.
«Sary maı boıynsha Qazaqstan ónimi - 79%, Reseı – 21%.
Shujyq ónimderine keler bolsaq – qazaqstandyq úles - 34%, Reseı – 60%, Belarýs - 6%. Taýyq eti boıynsha Petropavlda satylyp jatqan ónimniń 75% qazaqstandyq, qalǵany Reseıden ákelinedi. Kúnbaǵys maıy boıynsha Qazaqstan úlesi 38%, qalǵany Reseıden jetkiziledi», - deıdi Qanat Jeńisbekuly.
Buǵan deıin Petropavlda jaýyn saldarynan turǵyn úılerge sý kirgenin jazǵan edik.
