Petropavldaǵy Pestroe kólinde er adam sýǵa tunshyǵyp, kóz jumdy
PETROPAVL. KAZINFORM — Petropavlda qalalyq jaǵajaıda mert bolǵan 62 jastaǵy er adamnyń ólimine qatysty qylmystyq is qozǵaldy.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqıǵa 21 maýsym kúni saǵat 10:30 shamasynda bolǵan.
— Kýágerlerdiń aıtýynsha, jaǵajaıda 1963 jyly týǵan er adamnyń jaǵdaıy kenetten nasharlaǵan. Kómekke kezekshilikte bolǵan jedel-qutqarý jasaǵynyń qyzmetkerleri men jedel járdem brıgadasy kelip, reanımatsııalyq sharalar júrgizdi. Alaıda dárigerler er adamnyń ómirin saqtap qala almady.
Aldyn ala boljam boıynsha, er adamnyń ólimine mıokard ınfarktisi men jedel júrek jetkiliksizdigi bolýy múmkin degen dıagnoz qoıyldy. Naqty sebebin anyqtaý úshin marqumnyń denesi sot-medıtsınalyq saraptamaǵa jiberildi, — deıdi SQO TJD resmı ókili Marına Samoılenko.
Mamannyń aıtýynsha, oqıǵa bolǵan kezde jaǵajaıda TJD jedel-qutqarý jasaǵy men kommýnaldyq jaǵajaıdyń 6 qutqarýshysy kezekshilikte bolǵan. Sondaı-aq, júzý quraly jáne 3 qyzmetkeri bar jedel medıtsınalyq járdem kóligi turǵan.
SQO polıtsııa departamenti baspasóz qyzmetiniń málimetinshe, sot-medıtsınalyq saraptama qorytyndysy shyqty. Er adamnyń tynys alý joldary sýǵa tolyp bitelýi saldarynan tunshyǵyp, kóz jumǵany anyqtaldy.
Qazir osy fakti boıynsha qylmystyq is tirkelip, sotqa deıingi tergeý júrip jatyr.
Petropavldaǵy resmı bekitilgen jalǵyz shomylý ornyna qatysty sońǵy kezde turǵyndardyń narazylyǵy kúsheıip keletini týraly jazǵan edik.
Buǵan deıin Qaraǵandyda jasóspirim sýǵa batyp ketkenin jazǵan edik.
