Petropavldaǵy munaı salasyna qajet qondyrǵylardy shyǵaratyn iri zaýyt satylymǵa shyǵaryldy
PETROPAVL. KAZINFORM — Kezinde zymyrannyń ushyrý qondyrǵylaryn shyǵarǵan Petropavl aýyr mashına jasaý zaýyty aýktsıonǵa shyǵaryldy.
e-qazyna.kz portalynda «Qazaqstan ınjınırıng» ulttyq kompanııasyna tıesili zaýyttyń bastapqy baǵasy — 17 816 925 000 teńge dep kórsetilgen.
1950 jyly qurylǵan kásiporynda kezinde myńdaǵan adam eńbek etti. Zymyrannan bastap, keıin turmystyq taýarlar, velosıpedterge deıin shyǵardy.
Zaýyt qalanyń damýyna da úles qosyp, stadıondar, mádenıet úılerin, óz jumysshylaryna arnap baspanalar turǵyzdy.
Búginde 75 myń sharshy metrdi alyp jatqan zaýytta 500-ge jýyq jumys orny bolsa, qazirgi ýaqytta sonyń jartysy ǵana jumys istep jatyr.
Petropavl aýyr mashına jasaý zaýyty — Qazaqstandaǵy munaı-gaz óndirý, munaı-gaz óńdeý, munaı-hımııa, hımııa, gaz, energetıka jáne basqa da ónerkásip salalaryna arnalǵan jabdyq shyǵaratyn iri mashına jasaý kásiporyndarynyń biri. 20 jyldan astam halyqaralyq standart boıynsha jumys istep keledi.
Kásiporynnyń málimetinshe, qazir olardyń negizgi tapsyrys berýshileri — «QazMunaıGaz» ulttyq kompanııasy» AQ, «Embimunaıgaz» AQ, «Ózenmunaıgaz» AQ, «ÓzenMunaıServıs» JShS, «Burǵylaý jumystary jáne uńǵymalarǵa qyzmet kórsetý basqarmasy» JShS jáne basqalary.
Buǵan deıin Qazaqstanda mashına jasaý salasynda óndiris kólemi jeti aıda 3,2 trln teńgege jetip, byltyrǵy osy kezeńmen salystyrǵanda 22% óskenin jazǵan edik.
