Petropavldaǵy memlekettik kirister basqarmasy qyzmet kórsetýde antırekord ornatty
PETROPAVL. KAZINFORM – Soltústik Qazaqstan oblysynda memlekettik qyzmet kórsetý tártibi men merzimderin buzýdyń 1,6 myńnan astam faktisi anyqtaldy.
QR Memlekettik qyzmet isteri agenttiginiń SQO boıynsha departamenti memlekettik qyzmetti kórsetýge qatysty tekserýlerdiń qorytyndysyn shyǵardy. Mamandar halyqqa qyzmet kórsetetin memlekettik organdardyń 2024-2025 jyldar aralyǵyndaǵy qyzmetin qamtydy. Nátıjesi kóńil kónshitpeıdi.
Petropavl qalasy boıynsha memlekettik kirister basqarmasyna antırekord ornatty. Munda qyzmet kórsetý tártibin buzýdyń 1209 faktisi, sondaı-aq jumys kestesin saqtamaýdyń 5 faktisi tirkelgen.
Aýdandardaǵy jaǵdaı da máz emes. Mamlıýt aýdany jer qatynastary bóliminde 203, Mamlıýtka qalasy ákimi apparatyn tekserý barysynda 7 zańbuzýshylyq tirkeldi.
Aıyrtaý aýdany ákimi apparatynda 103 tártip buzýshylyq anyqtalsa, osy aýdannyń sáýlet, qurylys, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminde 90 zańbuzýshylyq jáne qyzmet kórsetý merzimin buzýdyń 1 jaǵdaıy tirkeldi. Osy úshin bólim basshysy ákimshilik jaýapkershilikke tartyldy.
Mamandardyń aıtýynsha, anyqtalǵan zańbuzýshylyqtardyń basym bóligi rásimderdi durys júrgizbeý jáne reglamenttelgen merzimderdi saqtamaýǵa qatysty. Mundaı zańbuzýshylyqtar halyqtyń memlekettik qyzmet kórsetý júıesine degen senimin tómendetedi.
Tekserý qorytyndysy boıynsha jaýapty tulǵalardyń bir bóligi ártúrli tártiptik jaýapkershilikke tartyldy. Vedomstvolarǵa zańbuzýshylyqtardy joıý týraly nusqamalar men ishki baqylaýdy kúsheıtý boıynsha usynymdar berildi.
Esterińizge salaıyq, kelesi jyldan bastap memlekettik qyzmetshiler jumysqa tek onlaın qabyldanady.