Petropavldaǵy mektepte oqýshylarǵa berilgen tamaqtan jándikter tabyldy
PETROPAVL. KAZINFORM – Petropavlda ata-analar qazaq mektep-gımnazııasyndaǵy ashana qyzmetiniń sapasyna narazylyqtaryn bildirdi.
Olar Soltústik Qazaqstan oblystyq bilim basqarmasyna hat jazyp, kásipkerdi aýystyrýdy talap otyp otyr. Ata-analardyń aıtýynsha, ashanada beriletin tamaq óte nashar, balalar ishpeı, úıge ash keledi eken.
- Ashanada taraqandar órip júr, sanıtarııalyq-gıgıenalyq talaptar saqtalmaıdy. Tamaqtary sapasyz azyq-túlikten daıyndalady, shıki, dámsiz, balalar ishpeı qaıtaryp beredi sol qalpy.
Meniń 1 jáne 3-synypta oqıtyn balalarym tamaqtary jaman, tek shaı iship, nan ǵana jeımiz dep aıtady, - deıdi Petropavl turǵyny Jazıra Zakırıanova.
Ata-analardyń aıtýynsha, olar kásipkermen birneshe ret kezdesken, olqylyqtardy joıýdy suraǵan. Biraq nátıje joq.
- Mektep unaıdy. Keń, bar jaǵdaı jasalǵan, tipti basseınine deıin bar. Sol úshin bıyl kúzde basqa mektepten aýysyp kelgen edik. Myna ashanasy bárin búldirip tur.
Búgin de bilim basqarmasyna shaǵymdanbas buryn kartop ezbesi bar bálish satyp aldyq, taǵy shıki, aǵyp tur. Bizdiń eskertýlerimizge qulaq aspaıdy, - deıdi Jazıra Zakırıanova.
SQO bilim basqarmasynyń málimetinshe, olar jaǵdaıdy baqylaýda ustap otyr.
- Ata-analardyń Petropavldaǵy Abaı atyndaǵy mamandandyrylǵan mektep-gımnazııasyna qatysty ár shaǵymy boıynsha tekseris, sonyń ishinde sanıtarlyq-epıdemıologııalyq, júrgizildi.
Ata-analarmen, tamaqtandyrý qyzmetin kórsetýshimen kezdesýler uıymdastyryldy.
Jeke kásipkerge anyqtalǵan olqylyqtardy belgilengen merzimde joıý jóninde habarlama-hat joldandy. Mekteptegi tamaqtaný sapasy kúndelikti monıtorıngke alyndy.Ata-analarǵa jaǵdaıǵa quqyqtyq baǵa berý maqsatynda prokýratýraǵa jáne oblystyq Sanıtarııalyq-epıdemıologııalyq baqylaý departamentine júginý usynyldy. Eger barlyq faktiler rastalsa, Bilim basqarmasy kásipkermen jasalǵan shartty sot tártibimen buzý sharasyn bastaıdy, - delingen basqarmanyń jaýabynda.
SQO ákimi Ǵaýez Nurmuhambetov osy jaǵdaıǵa qatysty jedel sharalar qabyldaýdy tapsyrdy.
SQO Sanıtarııalyq-epıdemıologııalyq baqylaý departamentine óńirdegi barlyq bilim berý uıymdarynyń mektep ashanalarynda keshendi tekserýdi júrgizý mindettedi.
SQO ákimdiginiń bilim basqarmasyna mektep dırektorynyń kásibı quzyrettiligin tekserip, bilim berý mekemesin basqarý sapasyna baǵa berý, sondaı-aq oblystaǵy barlyq mektepterdegi tamaqtanýdy uıymdastyrýǵa qatysty kelisimsharttardy tekserýdi tapsyrdy.
Bul jaǵdaıdy oblys ákimi jeke baqylaýynda ustaıdy.
Buǵan deıin ShQO-da mektep ashanasyndaǵy sorpa ishinde qurt tabylǵanyn jazǵan edik.