Petropavldaǵy mamandandyrylǵan HQKO avtodromy ýaqytsha jabylady
PETROPAVL. KAZINFORM – Eki apta boıy Petropavldaǵy mamandandyrylǵan halyqqa qyzmet kórsetý ortalyǵynyń avtodromynda jóndeý jumystary júrgizilmek.
«Azamattarǵa arnalǵan úkimet» memlekettik korporatsııasynyń Soltústik Qazaqstan oblysy boıynsha fılıalynyń habarlaýynsha, Nefteprovodnaıa kóshesi, 7 mekenjaıynda ornalasqan avtodromda jóndeý jumystary 3 tamyzda bastalady. Osyǵan baılanysty júrgizýshi kýáligin alý úshin praktıkalyq emtıhan tapsyrý múmkin bolmaıdy.
Jóndeý barysynda avtodromnyń asfaltbeton jabyny tolyq jańartylyp, jol tóseminiń sapasy jaqsartylady. Bul emtıhan tapsyrýshylarǵa synaqtan qaýipsiz ári qolaıly jaǵdaıda ótkizýge múmkindik bermek.
Fılıal ókilderi aldyn ala jazylyp, praktıkalyq emtıhandy tapsyrý merzimi avtodromdy jóndeý ýaqytyna tuspa-tus kelgen azamattarǵa emtıhannyń jańa kúnin qaıta tańdaý qajettigin eskertedi. Olar jaqyn mańdaǵy qalalardaǵy mamandandyrylǵan HQKO-larǵa jazyla alady nemese jóndeý jumystary aıaqtalǵannan keıin Petropavldaǵy mamandandyrylǵan HQKO-da emtıhan tapsyrady.
- Jóndeý jumystary tek avtodromda júrgiziledi. Al Petropavl qalalyq mamandandyrylǵan HQKO-da kórsetiletin ózge memlekettik qyzmetterdiń barlyǵy shtattyq rejımde jalǵasady, - deıdi mamandar.
Buǵan deıin Shyǵys Qazaqstan oblysy Zaısan aýdanynyń turǵyny júrgizýshi kýáligin zańsyz jasatpaqshy bolyp, alaıaqqa 6,6 mln teńge bergenin jazǵan edik.
