Petropavldaǵy kóshelerdiń birinde sý birneshe aıdan beri dalaǵa aǵyp jatyr

Petropavldaǵy Jýkov kóshesiniń boıynda birneshe aıdan beri sý dalaǵa aǵyp jatyr. Suraýy bolmaǵandyqtan búginde onyń orny batpaqqa aınala bastaǵan, dep habarlaıdy Kazinform.

Petropavldaǵy Jýkov kóshesi boıyndaǵy úılerdiń turǵyndary dalaǵa aǵyp jatqan sý jaıynda birneshe ret másele kótergen. Alaıda estir qulaq joq. Qalalyqtar bir kúni sý kópqabatty úılerdiń jertólelerine kirer me eken dep alańdaýly.

Jergilikti bılik bul máselege qanyq. Alaıda sýdyń qaıdan aǵyp jatqanyn anyqtaı alar emes.

- Bul ýchaske arqyly birneshe sý qubyry ótedi. Olardyń biri «Sevkazenergo» AQ, «Qyzyljar Sý» JShS-ge tıesili bolsa, endi biri «Petropavl jylý jelileri» JShS qaraıdy. Sýdyń qaıdan aǵyp jatqanyn anyqtap jatyrmyz. Keıin menshik ıesi jarylǵan jerdi jóndeıdi. Ázirge qalalyq ákimdik ol jerdegi sýdy qalanyń jaýyn sýy kárizine aǵyzyp jatyr, - dep jaýap berdi Petropavl qalasy ákimdigi baspasóz qyzmetinen.

2019 jyly qazirgi sý basqan aýmaqta 400-deı garaj turdy. Jergilikti bılik birer jyldyń ishinde olardy alǵyzyp tastady. 2021 jyly oblystyń eks-ákimi Qumar Aqsaqalov jol boıyna jańa jylý trassasy salynatyndyǵyn, keıin aınalasy saıabaqqa aınalatynyn aıtty, tipti eskızdik jobasy da jasaldy. Biraq bul ýchaskede bastapqyda shalshyq sý jaıylsa, búginde batpaqqa aınalýǵa shaq tur.