Petropavldaǵy kóp qabatty úılerdiń 55 paıyzy ǵana jylytý maýsymyna daıyn
PETROPAVL. KAZINFORM — Petropavldaǵy ortalyq jylý jelisine qosylǵan 1198 úıdiń 670-i ǵana ázirge daıyndyq qujatyn aldy.
Petropavl qalasy ákiminiń málimetinshe, jalpy 1241 kóp qabatty úı bar, onyń 43-inde pesh jaǵylady.
Sondaı-aq 425 baspanada basqarý formasy joq. Sonyń ishinde 27 kóp qabatty úı apattyq jaǵdaıda tur. Olar negizinen eki qabatty úıler.
— Turǵyn úı qoryn jylytý maýsymyna ázirleý kúndelikti bizdiń baqylaýymyzda. Negizgi mindet — úı ishilik jylý jelilerin jýyp-shaıý jáne qysymmen tekserý. Búginge deıin kóp qabatty úılerdiń tek 55% ǵana bul jumysty istedi, — deıdi qala ákimi Serik Muhamedıev.
Al oblys ortalyǵyndaǵy áleýmettik nysandar qazir maýsymǵa 95% daıyn.
Bıyl Petropavlda 7 km jylý jelisi kúrdeli jáne aǵymdaǵy jóndeýden ótýi tıis. 4 km jeliniń jylý oqshaýlaǵysh qabatyn qalpyna keltirý kózdelgen.
— Petropavlda ádette jylý berý maýsymy qyrkúıek aıynyń 20-25 aralyǵynda bastalady. Jylý nysandarǵa kezeń-kezeńmen beriledi. Aldymen bilim berý, medıtsınalyq, mádenıet-sport nysandary qosylady, keıin turǵyn úılerge jylý berile bastaıdy.
Sondaı-aq 25 qyrkúıekte dástúr boıynsha qalanyń sý berý jelisin jýý josparlanǵan. Oblys ortalyǵy bir táýlikke sýdan ajyratylady, — dedi Serik Muhamedıev.
Osyǵan deıin SQO-nyń energetıkalyq nysandaryn jónge keltirýge 24 mlrd teńgeden astam qarjy baǵyttalǵanyn jazǵan edik.
