Petropavldaǵy Kırov atyndaǵy zaýyt satylymǵa shyqty: 600-ge jýyq jumysshynyń orny saqtala ma
PETROPAVL. KAZINFORM - «Qazaqstan ınjınırıng» ulttyq kompanııasy Petropavldaǵy S. M. Kırov atyndaǵy zaýyttyń 100% aktsııasyn elektrondyq saýdaǵa shyǵardy.
E-qazyna.kz elektrondy saýda portalynda kásiporynnyń bastapqy quny 9,1 mlrd teńge dep kórsetilgen. Zaýytty satyp alýshy óndiris profılin, jumys oryndaryn saqtaý jáne memlekettik qorǵanys tapsyrystaryn oryndaý syndy birqatar áleýmettik jáne ekonomıkalyq sharttardy oryndaýǵa mindetti.
Saýdaǵa qatysýǵa ótinimder 27 qarasha kúni saǵat 10:55-ke deıin qabyldanady. Al aýktsıon saǵat 11:00-de bastalady. Qatysýshylar 1,3 mlrd teńge shamasynda kepildik jarna tóleýi qajet.
Habarlandyrýda zaýytta ortasha 590 adam jumys isteıtindigi kórsetilgen.
Sondaı-aq, kásiporynnyń bereshegi týraly da aqparat bar. 2026 jylǵy 27 qazandaǵy qarjylyq anyqtamaǵa sáıkes, Kırov atyndaǵy zaýyttyń kredıtorlyq bereshegi 24,4 mlrd teńgege jýyqtaǵan. Onyń basym bóligi, ıaǵnı, 22 mlrd teńgesi - alynǵan qysqa merzimdi avanstar. Al kásiporynnyń debıtorlyq bereshegi 13,2 mlrd teńge.
S.M. Kırov atyndaǵy zaýyt 1928 jyly Máskeýde qurylyp, 1942 jyly Petropavlǵa kóshirilgen. Soǵys ýaqytynda zaýyt ujymy maıdandy ásker arasynda úlken suranysqa ıe bolǵan radıoqabyldaǵyshtar men radıopelengatorlarmen qamtamasyz etti.
Keıin zaýyt halyq sharýashylyǵy men turǵyndardyń qajetine arnalǵan radıoqabyldaý qurylǵylaryn shyǵarýǵa kóshti.
Qazirgi ýaqytta kásiporyn arnaıy baılanys quraldary men tsıfrlyq telehabar taratý jabdyqtaryn óndirýge mamandanǵan. Sonymen qatar temirjol kóligine arnalǵan avtomatıka, telemehanıka, baılanys quraldary men qaýipsizdik júıelerin jáne basqa da jabdyqtardy shyǵarady. Olardyń qatarynda Qazaqstan Qorǵanys mınıstrligi men kúshtik qurylymdaryna arnalǵan baılanys quraldary da bar.
Buǵan deıin bir kezderi noýtbýk qurastyrǵan Kırov zaýyty qazir qandaı ónim shyǵaratynyn jazǵan edik.
