Petropavldaǵy Islam mádenıeti mýzeıinde 1,5 ǵasyrlyq jaınamaz saqtalǵan
PETROPAVL. KAZINFORM — Petropavldaǵy kóne meshittiń ǵımaratynda oryn tepken Islam mádenıeti mýzeıinde saqtalǵan kóne muranyń biri — 1870 jyly tigilip, osy kúnge deıin búlinbeı jetken jaınamaz.
Islam mádenıeti mýzeıiniń dırektory Murat Ámirjanovtyń aıtýynsha, mýzeı jumysynyń negizi maqsaty — ǵylymı-aǵartýshylyq, ǵylymı-zertteý, baǵa jetpes jádigerlerdi jınaý jáne ony kópshilikke tanytý.
— Bul jaınamazdy Bábish qajynyń anasy tigip bergen, osy jaınamazben atamyz, ol Aqjar aýdany Úlken Qaraoı tóńireginen, Omby ýezi arqyly úsh ret qajylyqqa barǵan. Bir ret jamaǵat bolyp, eki ret kerýen basy bolyp barǵan. Ol kisini bara jatqandar kerýenbasy etip taǵaıyndaǵan, óıtkeni ol kisi Islam qaǵıdalaryn tolyq meńgergen adam. Odan taraǵan urpaq mýzeıge syılap, bul qazir bizdegi kóne jádigerlerdiń biri, — deıdi Murat Ámirjanov.
Mýzeı dırektorynyń aıtýynsha, Bábish qajynyń shyn aty — Qabdyrahman. Ol arab tilinde erkin sóılep, grammatıkasyn jetik meńgergen, sondaı-aq Qurannyń otyz parasyn tolyq oqı alatyn bilimdar bolǵan. Bábish qajynyń saparlarda paıdalanǵan jaınamazy, kıeli mura retinde, urpaqtan-urpaqqa amanat bolyp saqtalyp keledi.
— Jaınamazdy qazaqtar qasıetti sanap, aıaq astyna tastamaǵan, árdaıym belden joǵary ustaǵan. Óıtkeni Quranda belden tómen ustaýǵa bolmaıdy dep jazylǵan hadıs bar. Buryn kıiz úılerde jel soǵyp, shań basqandyqtan da joǵary qoıyp, tazalyǵyn qatty qurmettegen. Sol sebepti de osy kúnge deıin óte jaqsy saqtalyp, jetken, — deıdi Ámirjanov.
Buǵan deıin Ulttyq kitaphana jańa sırek qoljazbamen tolyqqanyn jazǵan edik.