Petropavldaǵy ǵasyrdan astam tarıhy bar kóne dıirmen jańǵyrtylady
PETROPAVL. KAZINFORM — Petropavlda ótken ǵasyrdyń basynda salynǵan, buzylýdyń sál-aq aldynda qalǵan kópes Polıakovtyń dıirmenin qalpyna keltirý josparlanǵan.
Soltústik Qazaqstan oblysy mádenıet, tilderdi damytý jáne arhıv isi basqarmasynyń málimetinshe, tarıhı nysan 90 jyldardan beri jekemenshiktiń qolynda. Petropavlǵa ınvestor kelip, ǵımaratty satyp aldy. Endi jospar boıynsha 10 mlrd teńgeden astam qarajat jumsap, bıyl shilde aıynda meıramhana-meımanhana keshenin paıdalanýǵa bermek.
— Joba aıasynda ǵımarattyń tarıhı jáne sáýlettik kelbeti tolyq saqtalady. Qalpyna keltirý jumystary barysynda barlyq qundy elementter uqyptylyqpen jańǵyrtylyp, nysannyń mádenı jáne tarıhı mańyzy saqtalady. Restavratsııa aıaqtalǵannan keıin ǵımarat jańa tynys alyp, etno-meıramhana-kofehanasy bar zamanaýı qonaqúı keshenine aınalady. Joba tujyrymdamasy Chıkago, Pekın, Máskeý, Tashkent, Almaty (Kólsaı kóli), Astana, Semeı jáne Býrabaı qalalarynda usynylǵan tabysty halyqaralyq franshıza negizinde ázirlengen. Jobany júzege asyrý óńirdiń týrıstik áleýetin damytýǵa eleýli úles qosyp, tarıhı-mádenı murany saqtaý jáne nasıhattaý isinde mańyzdy qadam bolmaq, — deıdi basqarma basshysy Dosbol Ábdirıisov.
Ótken ǵasyrdyń basynda tórt dıirmen jumys istese, sonyń úsheýiniń ǵımaraty búginge deıin jetken. Sonyń biri — osy kópes Polıakovtyń dıirmeni.
Petropavldyń shetinde ornalasqan bul ǵımarat XIX ǵasyrdyń sońy men HH ǵasyrdyń basyndaǵy shaǵyn kópes qalasyna tán josparlaý úlgisin kórsetedi.
Ǵımarat kópes Iosıf Polıakovtyń bastamasymen salynǵan un tartý dıirmeni retinde belgili. 1905 jyly kirpishten dıirmen qurylysy bastalyp, 1907 jyly paıdalanýǵa berilgen. Kásiporyn sol zamanǵa saı nemis jáne shveıtsarııalyq zamanaýı qural-jabdyqtarmen jabdyqtalǵan.
Keńestik zamanda ǵımarat memleket menshigine alynyp, № 8 dıirmen zaýytynyń qaramaǵyna berildi. 1948–1955 jyldary munda mahorka fabrıkasy jumys istedi. Keıin ǵımarat № 2 tigin fabrıkasyna tapsyrylyp, ol keıinnen «Komsomolka» fabrıkasymen biriktirildi. Osylaısha nysan ár kezeńde óndiristik maqsatta paıdalanylyp, qalanyń ekonomıkalyq ómirinde mańyzdy ról atqardy.
Bastapqy jobasy boıynsha ǵımarat tórt qabatty, tikburyshty pishindegi kirpishten salynǵan. Keıin oǵan kóptegen qoımalyq jáne qosalqy bólmeler jalǵanǵan eken. Іrgetasy — kirpishten qalanǵan, jabyndary — aǵash arqalyqtardan, shatyry — temirmen jabylǵan. Uzyn fasadtarynda sopaqsha pishindi tereze oıyqtary ornalasqan.
Al, ólketanýshylardyń boljamynsha, dıirmen salynǵan aýmaq bir kezderi Ýálı hannyń ıeliginde bolǵan. Ol — qazaqtyń uly ǵalymy ári aǵartýshysy Shokan Ýalıhanovtyń atasy.
Ǵımarat tarıhı-mádenı eskertkish retinde memleket qorǵaýyna alynǵan.
Buǵan deıin Qazalyda HH ǵasyrda salynǵan sý qyspaqty munara áli kúnge jumys istep turǵanyn jazǵan edik.