Petropavldaǵy «Birlik» shaǵyn aýdany turǵyndary úıleriniń qujatyn ala almaı júr
PETROPAVL. KAZINFORM – Petropavlda tasqynnan zardap shekkenderge arnaıy turǵyzylǵan keı úılerdiń qujattary áli kúnge deıin daıyn emes.
2024 jyly tasqynnan keıin paıda bolǵan «Birlik» shaǵyn aýdanynda qazir 700 úı bar. Turǵyndardyń aldy munda 1,5 jyl buryn kóship kelgen. Biraq áli kúnge deıin menshik ıesi ekenin rastaıtyn qujatty qoldaryna almaǵan.
Amangeldi Bekmuratov Beskól aýylynda turǵan, tasqynda úı-jaıy tolyq sýǵa ketti. Jańa úıge kóship, másele sheshildi degen qýanyshy uzaqqa barmaǵan.
- Qujattardy bir ret jınap aparyp tapsyrdym ákimdikke, keıin ony joǵaltyp aldyq dep aıtty. Barlyǵyn qaıtadan jınap, tapsyrdym. Áne-mine beremiz deıdi úı qujattaryn. Aýyryp qaldym, erteń birdeńe bolsa, bul úıdi balalarymnan tartyp alady ǵoı, - deıdi Amangeldi Bekmuratov.
Turǵyndardyń aıtýynsha, qujattyń joqtyǵy kúndelikti ómirde kóptegen qıyndyq týǵyzǵan. Natalıa Prohorova 1,5 jyl buryn Bolshaıa Malyshkadan kóship kelgen. Petropavl turǵynynyń aıtýynsha, tirkeýge turmaǵandyqtan jaqyn mańdaǵy emhanaǵa qarala almaıdy, saldarynan qalanyń ekinshi basyna barýǵa májbúr.
- Byltyr jazda qujattardy beremiz dedi, keıin jańa jylǵa deıin qoldaryńa tıedi dedi. Endi sáýir-mamyrda alasyńdar dep otyr. Bar másele, aıtýlarynsha, baǵdarlamanyń durys jumys istemeýinde.
Qazir biz barlyq kommýnaldyq tólemderdi tólep otyrmyz. Biraq, jyljymaıtyn múlik bizdiki emes, qala balansynda tur. Úıdi atymyzǵa túsirmegendikten ne tirkeýge tura almaımyz, múlikti satý nemese muraǵa qaldyrý da múmkin emes, - deıdi «Biplik» shaǵyn aýdanynyń turǵyny.
Petropavl ákimi turǵyndarmen kezdesti. Aıtýynsha, menshik quqyǵyn rásimdeý protsesi uzaq ári kúrdeli. Baǵdarlamalar aýysqanǵa deıin 58 jer telimi tirkelip úlgergen, al shamamen 300 úıdiń qujattary daıyndalǵan.
- Maýsym-qarasha aılary aralyǵynda baǵdarlama aýysty. Durys jumys istemedi. Qarasha aıynan bastap qana jumys isteı bastady.
Adamdar úshin turǵyn úı qujattaryna qatysty máseleler óte mańyzdy ekenin túsinemin. Sondyqtan jaýapty bólimshelerge 14 kún ishinde 700 jer ýchaskesin tolyq daıyndaý boıynsha naqty tapsyrmalar berdim.
Sonymen qatar, árbir menshik ıesimen naqty jumysty uıymdastyrýdy - qujattardy resimdeýde jeke kómek kórsetýdi jáne týyndaǵan máselelerdi jedel sheshýdi tapsyrdym, - dedi qala ákimi Serik Muhamedıev.
Buǵan deıin SQO-da tasqyn qaýpin boljaý úshin qar jamylǵysynyń kórsetkishteri ólshenip jatqanyn jazǵan edik.