Petropavldaǵy botanıkalyq baq aýmaǵyna esirtki jasyrýshylar kóbeıdi

Onyń aıtýynsha, ótken demalys kúni kelýshilerdiń biri er adamnyń baq aýmaǵynda túıinshek jasyryp jatqanyn baıqap qalǵan. Birden oqıǵa ornyna polıtsııa qyzmetkerlerin shaqyryp, tártip saqshylary belgisiz hımııalyq zat salynǵan oramany tárkiledi.

- Kelesi kúni bizdiń baqtyń aýmaǵyna kúmándi adamdar kele bastady. Butalardyń túbin qoparyp, joq izdegen olar qyzmetkerlerimizdiń de, qonaqtarymyzdyń da záresin ushyrdy. Rıýkzak asqan er adam ary-beri júrip, birazdan keıin ketti. Onyń ekskýrsııaǵa kelmegeni anyq. Odan keıin basqalary kele bastady. Ne izdep júrsiń dep suraǵanymyzda, bireýi «kiltimdi joǵalttym» dedi, endi biri múlde jaýap bermeı qasha jóneldi, - deıdi Artýr Rıazapov.

Baq dırektorynyń aıtýynsha, kúdikti adamdar aýmaqta uzaq aıaldamaıdy, sol sebepti polıtsııanyń jedel tobyn shaqyrý múmkin emes, kelip úlgermeıdi.

- Qazir baqta kúzgi jumystardy júrgizý kerek. Biraq qyzmetkerlerimiz dalaǵa shyǵýǵa qorqady. Sol sebepti polıtsııadan bul máseleni sheshý úshin kómek suraımyz. Jaǵdaı jaqsarǵansha baq mańynda tártip saqshylary kezekshilik atqarsa eken, - deıdi Artýr Rıazapov.

Soltústik Qazaqstan oblysy polıtsııa departamentiniń málimetinshe, 27 qyrkúıekte Petropavldaǵy botanıkalyq baq aýmaǵynan kúdikti túıinshek tabylǵan. Zat tárkilenip, saraptamaǵa jiberilgen. Osy fakti boıynsha sotqa deıingi tergeý júrgizilip jatyr.

- Qazirgi ýaqytta jaǵdaı qalalyq polıtsııa basqarmasy basshylyǵynyń baqylaýyna alyndy. Kúdikti zattar nemese quqyq buzýshylyq bolýy múmkin jaǵdaıda aqparatty dereý «102» nómirine nemese eGov Mobile, Halyk jáne Kaspi.kz qosymshalaryndaǵy «Zań jáne tártip» servısi arqyly quqyq qorǵaý organdaryna habarlaýdy suraımyz, - deıdi polıtsııa ókilderi.

Buǵan deıin Petropavlda júzý jattyqtyrýshysy esirtki aınalymyna qatysy bar degen kúdikke ilikkenin jazǵan edik.