Petropavldaǵy «Bıotoǵan» — sarqyndy sý jınaqtaǵysh aınalasyndaǵy bóget nyǵaıtylyp jatyr
PETROPAVL. KAZINFORM — Petropavldaǵy sarqyndy sý jınalatyn «Bıotoǵannyń» aınalasyn qorshaǵan bóget kúrdeli jóndelip jatyr.
«Qyzyljar sý» JShS-niń málimetinshe, toǵannyń aınalasyn uzyndyǵy 3,4 km bolatyn bóget qorshaǵan. Biraq ýaqyt óte kele ol birshama otyrǵan. Sol sebepti bıyl nysandy kúrdeli jóndeý jobasy qolǵa alyndy.
— Búginge deıin 2,7 km bóget jobalyq belgige deıin kóterildi. Ol úshin 160 myń m3 topyraq, 6,5 myń m3 sary balshyq qoldanyldy. Bógettiń jıekterin sý shaımaýy úshin beton plıtalar qoldanylyp, bekitiledi, — delingen baspasóz habarlamasynda.
«Bıotoǵan» sarqyndy sý jınaqtaǵyshy Petropavldaǵy negizgi kollektorlarmen birge 1953 jyly salyndy. Al aınalasyndaǵy bóget 1968 jyly turǵyzylǵan.
— Petropavldyń káriz jelisine aǵyndy sýlardy jınaqtap, saqtaıtyn sarqyndy sý jınaqtaǵyshy kiredi. 2014 jyly respýblıkalyq bıýdjetten jınaqtaǵyshty qorshaǵan bógetti jóndeýge qajetti somanyń 50%-y bólinip, ıgerildi. Búgingi kúni osy jylǵy sý tasqyny jaǵdaıyn eskere otyryp, buryn jóndelgen bógettiń bıiktigin ósire otyryp, aıaqtalmaǵan ýchaskeni kúrdeli jóndeý boıynsha jumys júrgizilip jatyr. Joba bógetti nyǵaıtýǵa, osylaısha tabıǵı sıpattaǵy tótenshe jaǵdaıdyń aldyn alýǵa múmkindik bermek, — deıdi kásiporyn mamandary.
Buǵan deıin Petropavlda tasqynnan zaqym kelgen sorǵy stansasy 4 metrlik gabıonmen nyǵaıtylyp jatqanyn jazǵan edik.