Petropavldaǵy balabaqshalarǵa azyq-túlik kóterilgen baǵamen alynyp kelgen

PETROPAVL. KAZINFORM – Petropavl qalasy prokýratýrasynyń qadaǵalaý aktisi boıynsha mektepke deıingi bilim berý uıymdarynyń bıýdjet qarajatyn tıimsiz jumsaýyna jol berilmedi.

Soltústik Qazaqstan oblystyq prokýratýrasynyń málimetinshe, Petropavl qalasynyń prokýratýrasy bilim berý uıymdaryn tekserip, nátıjesinde áleýmettik mańyzy bar azyq-túlik taýarlaryn memlekettik satyp alý kezinde baǵany kótermeleý faktileri bolǵanyn anyqtady.

Mysaly, taýardy jetkizýshiler balabaqshalarǵa qaraqumyq jarmasynyń kılogrammyn 700 teńgeden satqan, al onyń naryqtaǵy ortasha baǵasy 330 teńge bolǵan.
Sondaı-aq basqa da azyq-túlik ónimderiniń - kartop, sary maı jáne kúnbaǵys maıy, qant jáne t.b. kóterilgen baǵamen satyp alynǵany anyqtaldy.

Qalyptasqan zańbuzýshylyqty joıý jáne bıýdjet qarajatyn tıimsiz paıdalanýdy boldyrmaý maqsatynda prokýratýra ony joıý týraly usyný engizdi.

Qadaǵalaý aktisi boıynsha azyq-túlik ónimderin satyp alý boıynsha kalkýlıatsııa qaıta bekitildi, bul bıýdjet qarajatynyń 30 mln teńgege artyq jumsalýyna jol bermedi.

Ýákiletti organ qazir áleýmettik mańyzy bar azyq-túlik taýarlaryn jetkizýshilermen qosymsha kelisimder jasasý jóninde jumys júrgizip jatyr. 

Buǵan deıin pavlodarlyqtarǵa jyl basynan beri 870 mln teńgeden astam aıyppul salynǵanyn jazǵan edik.