Petropavldaǵy balabaqshada erekshe balany balkonǵa qamap qoıǵan
PETROPAVL. KAZINFORM – Petropavlda otbasy erekshe qajettiligi bar balasyna jekemenshik korrektsııalyq balabaqshada qatygezdik kórsetti dep aıyptady.
Ata-ananyń aıtýynsha, olardyń eki jasar uly balabaqshadan birneshe ret denesi kógerip kelgen. Al qolynyń balabaqshada synǵanyn dáleldeı almaǵan.
Bir kúni balabaqshaǵa eskertpeı barǵan erli-zaıypty uldarynyń qulyptaýly sýyq balkonda jerde jatqanyn kórgen.
Bul oqıǵadan keıin er adam balabaqsha basshylyǵynan beınebaqylaý kameralaryndaǵy jazbalardy kórsetýdi talap etip, ulynyń buǵan deıin de balkonǵa birneshe ret qamalǵanyn kórgen.
Ata-ana quqyq qorǵaý organdaryna shaǵymdanǵanymen, qylmystyq is birneshe ret toqtatylǵan.
Soltústik Qazaqstan oblystyq bilim basqarmasynyń málimetinshe, osy oqıǵa boıynsha balabaqshaǵa qatysty ákimshilik shara qoldanylǵan. Bilim salasynda sapany qamtamasyz etý departamenti ákimshilik quqyq buzýshylyq týraly qaýly shyǵaryp, balabaqsha meńgerýshisi aıyppul túrinde ákimshilik jazaǵa tartylsa, tárbıeshi men tárbıeshiniń kómekshisi jumystan shyǵarylǵan.
Balanyń ata-anasy bul jaza jetkiliksiz dep esepteıdi, olar qaıta tekserýdi talap etip otyr.
Buǵan deıin Qyzylorda qalasynyń turǵyny aýtızm dıagnozy qoıylǵan qyzyn qaladaǵy damytý ortalyǵynyń qyzmetkeri urǵanyn aıtyp, qoǵam nazaryn aýdarǵan edi.
