Petropavldaǵy aıyp turaǵynda 10 jyldan artyq turǵan kólikter bar

Aıypturaǵy 2021 jyldan beri Petropavl qalalyq ákimdiginiń turǵyn úı-kommýnaldyq sharýashylyq bóliminiń balansynda. Jalpy aýmaǵy - 0,8 gektar. Bir qyzyǵy, munda kólikter tegin saqtalady. 

- Qazirgi ýaqytta turaq aýmaǵynda 283 jeńil avtokólik, bir-birden traktor, qarda júretin tehnıka, motoblok jáne eki avtotirkeme bar. Onyń ishinde on shaqty tehnıka on jyldan artyq tur.

Kólikterdiń uzaq ýaqyt alynbaýynyń túrli sebebi bar. Biri qarjylyq qıyndyqqa tap bolǵan, endi biri qujattaryn rásimdeı almaǵan. Keıbir avtokólikterge qatysty tergeý nemese protsessýaldyq áreketter aıaqtalmaǵan, - deıdi bólim basshysynyń orynbasary Aıdyn Makenov.

Zań boıynsha kólik quraldarynyń mamandandyrylǵan turaqta bolý merziminiń belgili bir shegi qarastyrylmaǵan.

- Kólik quraly uzaq ýaqyt turyp qalǵan jaǵdaıda, Petropavl ákimdigi ıesin anyqtaý jáne ony habardar etý boıynsha sharalar qabyldaıdy. Iesi týraly málimetter bolmaǵan nemese ıesi kólik quralyn belgilengen tártippen qaıtaryp alýǵa asyqpaǵan jaǵdaıda, kólik quralyn ıesiz dep taný týraly sotqa talap aryz joldanady. Al ıesi tabylmaǵan nemese kóligin qaıtarý boıynsha áreket jasalmaǵan jaǵdaıda, sot arqyly kólik ıesiz dep tanylyp, keıin saýda-sattyqqa shyǵarylady, - deıdi Aıdyn Makenov. 

Aıyp turaǵynda bir kezderi reseılik ánshi Tımýr ıÝnýsov – Tımatıge tıesili Audi TT Coupe avtokóligi de turdy. 2005 jyly ony bireýler ártistiń aýlasynan urlap ketken. Bir jyldan keıin kólik Petropavldan tabyldy. 

- Kólik tekserý jáne quqyqtyq mártebesin anyqtaý úshin turaqqa ýaqytsha ornalastyrylǵan. 2019 jyldyń jeltoqsanynda qajetti qujattar usynylǵannan keıin avtokólik ıesiniń senimhaty boıynsha onyń ókiline berilip, keıin Reseıge shyǵarylǵan. Qazirgi ýaqytta aıyppul turaǵynda tanymal tulǵalarǵa tıesili kólikter joq, - deıdi bólim basshysy. 

Buǵan deıin Atyraýda 3 myńnan astam sheteldik nómir taqqan avtokólik aıyp turaǵyna qoıylǵanyn jazǵan edik.