Petropavldaǵy áýejaıǵa túngi reısterge ruqsat berildi

PETROPAVL. KAZINFORM – «Qyzyljar halyqaralyq áýejaıy» JShS-niń tehnıkalyq múmkinshiligi artyp, endi halyqaralyq baǵyttarda jańa reıster ashý josparlanǵan.

Soltústik Qazaqstan oblysynyń ákimi Ǵaýez Nurmuhambetov «Qyzyljar halyqaralyq áýejaıy» JShS-nyń jańa dırektory Oktem Mustafa Iyltanmen kezdesti.

Oblystyq ákimdiktiń baspasóz qyzmeti málim etkendeı, kezdesýde áýejaıdyń damý perspektıvalary, ınfraqurylymdy jaqsartý jáne jolaýshylarǵa qyzmet kórsetý sapasyn jaqsartý máseleleri talqylandy.

Áýejaı jumysy alǵa basyp keledi. Máselen, jaqynda túngi reısterge ruqsat berildi. Nátıjesinde áýejaı táýlik boıy ushaq qabyldaı alady. Sondaı-aq, jańa janarmaı quıý stantsııasy iske qosyldy, bul logıstıkanyń jaqsarýyna, úlken áýe kemelerin qabyldaýǵa jol ashty.

Bolashaqta jańa halyqaralyq baǵyttardy ashý josparda bar. Bul áýejaıdyń áleýetin ulǵaıtyp, jolaýshylarǵa qyzmet kórsetýdi jaqsartýǵa jáne soltústikqazaqstandyqtar úshin týrıstik múmkindikterdi keńeıtýge septigin tıgizedi.

Esterińizge salaıyq, 2 shildeden bastap Petropavldan Mysyr eline tikeleı áýe reısi ashylady.