Petropavldaǵy apat: Káriz kollektory jarty ǵasyr buryn paıdalanýǵa berilgen

Petropavlda jarylǵan kárizdik kollektordyń tozyǵy jetken. Qubyr 1966 jyly paıdalanýǵa berilip, sodan beri aýystyrylmaǵan, dep habarlaıdy Kazinform.

Petropavlda jarylǵan káriz kollektorynyń paıdalanýǵa berilgenine 57 jyl bolǵan. Al normatıv boıynsha 25 jyl ǵana qoldanylýy tıis.

«2019 jyldan beri bul ýchaskeni jóndeý boıynsha qujat berip kelemiz. Qazir jobalaý-smetalyq qujattaryn ázirleýge qarjy bólindi.

Osy ýaqytta apat ornyn zerttep jáne jumys kólemin, qandaı materıal kerek – anyqtap jatyrmyz. Osydan keıin qalypqa keltirýge kirisemiz. Bul kollektormen 1990 jyldan bastap jumys istep kelemiz. Sodan beri birneshe ret jóndeldi.

Jalpy kollektorǵa 200-ge jýyq úı qosylǵan. Keshe negizinen jertólelerdi sý basý boıynsha shaǵymdar boldy. Biraq munyń keshegi apatqa qatysy joq. Kópqabatty úılerdiń jertólelerindegi ishki káriz qubyrlarynyń germetıkasy nashar. Onymen sol úılerge jaýapty PIK nemese múlik ıeleri birlestigi aınalysýy kerek», – deıdi «Qyzyljar sý» JShS keshen bastyǵy Vıacheslav Vızerov.

Mamannyń aıtýynsha, qazirgi ýaqytta merdigerler Petropavldaǵy Jýkov kóshesindegi kollektordy aýystyrýǵa iske kiristi, 3 km jańǵyrtylady. Odan keıin Abaı kóshesindegi nysan jónge keltiriledi.

Esterińizge salaıyq, keshe Petropavldaǵy Abaı jáne Áýezov kósheleriniń qıylysynda káriz kollektory jaryldy. Saldarynan Abaı kóshesin sý basty, aqqan sý jaqyn mańdaǵy kópqabatty úılerdiń jertólelerine de kirdi.