Petropavldaǵy 95 jyldyq tarıhy bar oqý orny soǵys jyldary 500-den asa feldsher daıarlady
PETROPAVL. KAZINFORM — Petropavldaǵy Jumaǵalı Tileýlın atyndaǵy joǵary medıtsınalyq kolledjde jeńistiń 80 jyldyǵyna oraı «Soǵys jyldaryndaǵy medqyzmetkerler: erlik pen mura» atty konferentsııa ótti.
Іs-sharaǵa kelgender oqý ornyndaǵy mýzeımen tanysyp, arnaıy kórmeni tamashalady.
Bul oqý orny 1930 jyly Petropavl medıtsınalyq tehnıkýmy bolyp ashylyp, 1939 jyly feldsherlik mektep bolyp qaıta quryldy.
Kolledjdiń ardagerler keńesiniń tóraǵasy Lıýdmıla Trapeznıkovanyń aıtýynsha, oqý ordasynyń baı tarıhy bar.
— 1941 jyly feldsherlik bólimge 180 adam, medbıke bólimine 22 adam qabyldandy. Solardyń 24-i úzdik bolǵandyqtan emtıhansyz qabyldandy. Sol jyly soǵystyń bastalýyna oraı túlekter emtıhan tapsyrmady. Birinshi kúni 75 boıjetken suranyp maıdanǵa attandy. Medıtsınalyq kolledjdiń kóptegen túlegi — soǵys ardageri. Solardyń biri — Marııa Kıtaeva Stanovoe aýylynda feldsher bolyp jumys istep júrgen jerinen 1943 jyly soǵysqa alyndy. Ol Donbassty, Voroshılovgradty, Ternopol, Jıtomır, Kıevti jaýdan azat etýge qatysty. Jeńisti sanıtarlyq rotanyń feldsheri bolyp júrip Venada qarsy aldy. «Qyzyl Juldyz» ordenimen, kóptegen medalmen marapattaldy. Mundaı mysaldar kóp, — deıdi Lıýdmıla Trapeznıkova.
Kolledjdiń taǵy bir túlegi Bazarbaı Tólebekov 358 atqyshtar dıvızııasynda sanıtarlyq ınstrýktor boldy. Bir jylǵa jetpeı Smolensk oblysy Myshkovo eldi mekeniniń mańynda qaza tapty. Jaralanǵan jaýyngerlerdi mashınamen apara jatqanda olardy fashıster atqylaǵan eken. Bul týraly týǵan-týystary tek 47 jyldan keıin ǵana bilip, baýyrlastar zıratyna jerlengenin bildi.
— Bizdiń mýzeıde Bazarbaıdyń jeke zattary — konspektileri, sońǵy haty, áskerge shaqyrý qujaty saqtalǵan. Onyń barlyǵyn 2015 jyly mýzeıdi qurǵanda týystary syılady. Búgin is-shara barysynda Bazarbaı Tólebekovtyń jeke zattarynyń bir bóligin oblystyq tarıhı-ólketaný mýzeıine berdik, — deıdi kolledj qyzmetkerleri.
Buǵan deıin Petropavlda «Uly Jeńistiń qadamy» atty kórme ashylǵanyn jazǵan edik.