Petropavlda jylý trassasynyń kollektory órtenip, gaz ballony jaryldy

PETROPAVL. QazAqparat – Petropavlda 66/37 áskerı bólimniń jaýyngerleri qala kóshelerin patrýldeý barysynda órtengen jylý trassasynyń kollektorynan eki adamdy qutqardy, dep habarlaıdy QazAqparat tilshisi.

Oqıǵa Petropavlda 5 qarasha kúni saǵat 20.00 shamasynda bolǵan. Chaıkovskıı kóshesinde qoǵamdyq tártipti saqtaý boıynsha jaýyngerlik qyzmet atqaryp júrgen patrýldik toptyń bastyǵy Nurym Baıbek pen qatardaǵy jaýyngerler Danıel Skrıpınets, Oljabek Sabyrbaev 2-shi emhananyń janyndaǵy jylý trassasynyń kollektorynan tútin shyqqanyn baıqaǵan. Kórshi áskerı narıadpen birge olar dereý órt shyqqan jerge jetedi.

«Jylý trassasynyń kollektorynda adamdar bolǵan. Áskerı bólim jaýyngerleri birden iske kirisip, janyp jatqan bólmeden áıel men er adamdy alyp shyqty. Osydan keıin jylý trassasynyń kollektorynyń ishindegi gaz ballony jaryldy», - deıdi QR Ulttyq ulan óńirlik qolbasshylyǵynyń qoǵammen baılanys jónindegi ofıtseri Muratbek Arystanbaev.

Áskerı narıad aýmaqty birden qorshaýǵa alyp, oqıǵa ornyna arnaıy qyzmetter – 101, 102, 103-ti shaqyrdy. Jedel járdem qyzmeti kúıik alǵan eki adamǵa medıtsınalyq kómek kórsetti.