Petropavlda jylý torabyn jóndeýge 2 mlrd teńge jumsalmaq
PETROPAVL. QazAqparat – Petropavlda bıyl jylý magıstraliniń úsh ýchaskesi jańǵyrtylady, dep habarlaıdy QazAqparat tilshisi.
«PetropavlJylýJelileri» JShS bas ınjeneri Vıtalıı Holosha kásiporynnyń bıylǵy jylǵa josparlarymen bólisti.
«2020 jyly úsh iri ınvestıtsııalyq jobany júzege asyrýdy josparlap otyrmyz. Osy maqsatqa shamamen 2 mlrd astam teńge qarjy jumsalmaq. Onyń ishindegi eń irisi - № 15 jylý magıstralindegi qalpyna keltirý jumystary. Sovetskıı kóshesinde ornalasqan toraptyń Iztolın kóshesinen Krepostnoı kóshesine deıin 1950 metri jóndeledi. Nátıjesinde bul ýchaskede jylý qýatyn az joǵaltatyn bolamyz. Jobany júzege asyrýǵa kásiporyn óziniń 1 mlrd teńgesin jáne Eýropa qaıta qurý jáne damý bankinen qaryzǵa alynǵan qarajatty jumsaıdy», - deıdi Vıtalıı Holosha.
Sondaı-aq, bankten alynǵan nesıe aqshaǵa Sovetskıı kóshesindegi № 7 jylý magıstraliniń Krepostnoıdan Altynsarın kóshesine deıingi aralyq – 1420 metr jóndelmekshi. Jónge keltiriletin úshinshi ýchaske M.Jumabaev kóshesinde ornalasqan. № 7-18 jylý torabynyń Almaty men Pýshkın kósheleriniń arasyndaǵy 412 metr qubyr aýystyrylady. Mundaǵy jóndeý jumystaryn kásiporyn óz qarajatyna atqarmaqshy.
«SevKazEnergo» AQ baspasóz qyzmetiniń málimetinshe, kásiporynnyń jylý jelisi búginde 70,35 % eskirgen.
«Jylýmen qamtý tarıfine engizilgen qarajat jetkiliksiz. Ol aqsha, tipti jelini qalypty jaǵdaıda ustaýǵa da jetpeıdi. Shtattyq tártipte jumys isteý úshin jylyna 25 shaqyrym qubyr aýystyrylýy kerek. Al qazirgi tarıfpen biz onyń jartysyn da jappaımyz. Sol sebepti jylda qubyr aýystyrǵanymyzben, jeliniń jalpy tozýy artpasa, kemıtin emes. Óıtkeni, júıeni qalypty deńgeıde aýystyrý úshin eki ese kóp qarajat kerek. Al oǵan tarıfti kótermeıinshe qol jetkizý múmkin emes», - deıdi bas ınjener.
