Petropavlda jylý magıstraline jańa ǵımarattardy qosý jeńildedi

Petropavlda ortalyqtandyrylǵan jylytý jelisine jańa ǵımarattardy qosý jaqynda, úsh negizgi jylý magıstralin kúrdeli jóndeýden ótkizgennen keıin múmkin boldy. Bul jaıynda «Petropavl jylý jelileri» JShS bas dırektory Andreı Kalınıchev málimdedi.

Alaıda, kásiporyn basshysynyń aıtýynsha, qalanyń Borkı kenti men Ýnıversalnaıa kóshesinen Egemen Qazaqstan kóshesine deıingi aralyqtaǵy ýchaske tehnıkalyq jaǵdaılarǵa baılanysty áli de bul múmkindikti paıdalana almaıdy.

«Jańadan salynyp jatqan shaǵyn aýdandar: «Jas Órken», «Bereke -1», «Bereke - 2», «Solnechnyı», «Orman», «Shyǵys», «Aq qaıyń», «ıÝbıleınyı» jáne qalanyń óndiristik aýmaǵynda kásipkerlerge jáne de turǵyndarǵa «Petropavl jylý jelilerine» qosylýǵa tehnıkalyq ruqsat birinshi kezekte beriledi. Shahardyń damýyna biz de osylaısha óz úlesimizdi qosamyz. Óıtkeni ár jańadan ashylǵan kásiporyn jumys oryndaryn beredi, ınfraqurylym damyp, ómir súrý sapasy jaqsarady», - deıdi Andreı Kalınıchev.

Kásiporyn jylýmen qamtý júıesin jańalaý jumystaryn bıyl da jalǵastyrmaqshy. Jylý energetıkteriniń aıtýynsha, jylý jelisin damytý tikeleı Petropavl qalasynyń perspektıvalyq qurylys josparymen tyǵyz baılanysty. Jylý magıstralin jańalaý jumystary ınvestıtsııa jáne kásiporynnyń jeke qarajaty esebinen jáne jańadan qosylatyn shaǵyn aýdandardyń ınjenerlik-kommýnıkatsııalyq ınfraqurylymyn damytý nátıjesinde júrgizilip jatyr.

Mamandardyń aıtýynsha, jylý magıstralin jóndeýge zamanaýı energııa únemdeıtin tehnologııalar paıdalanyldy. Polıpropılenmen oralǵan qubyrlar sý men jylýdyń shyǵynyn azaıtýǵa múmkindik beredi jáne olardyń qyzmet merzimi de artyp otyr.

Jalpy, «Petropavl jylý jelileri» JShS jyl basynan 73 kásipkerge, 106 turǵynǵa jáne 13 bıýdjettik uıymǵa jylý magıstraline qosylýǵa ruqsat bergen. Jalpy qýaty - 35,72 Gkal/saǵ. Sondaı-aq kásiporyn mamandary jylý jelisine qosylýdyń tegin júzege asyrylatynyn aıtady.